Ish deputeti i PS-së i bashkohet Lapajt në protestë kundër Ramës

Ish-deputeti i Partisë Socialiste, Vladimir Kosta, është parë sot mes protestuesve të lëvizjes “Shqipëria Bëhet”, gjatë tubimit të zhvilluar përpara Kryeministrisë. Aktivistë dhe mbështetës të kësaj nisme iu bashkuan protestës së thirrur nga Adriatik Lapaj, e drejtuar kundër kryeministrit Edi Rama.

Mes pjesëmarrësve ra në sy edhe prania e ish-deputetit socialist, i cili u pa krah protestuesve, duke tërhequr vëmendjen për shkak të qëndrimeve të tij të fundit publike ndaj qeverisë.

Kujtohet se vetëm dy ditë më parë, Vladimir Kosta kishte sulmuar ashpër kryeministrin Rama përmes një reagimi publik, ku e akuzonte se po shkatërron dhe po cenon pasurinë e qytetarëve. Në mesazhin e tij, Kosta e cilësonte Ramën si një kryeministër që “prish, dhunon dhe minon pasurinë e shqiptarëve”, duke ironizuar thirrjet e tij për investitorë të huaj.

“…Pa pikën e turpit kërkon investitorë të huaj… Si të zë vendi…”, shkruante Kosta në reagimin e tij.

Po ashtu, ish-deputeti kishte publikuar edhe pamje nga shembja e tre vilave në pronësi të tij, në periferi të Tiranës, të cilat autoritetet i kishin cilësuar si ndërtime pa leje, duke e konsideruar këtë veprim si një akt të padrejtë ndaj tij.