Ish-ministri i drejtësisë, Nasip Naço shkon në SPAK

Kryetari i Komisionit të Sigurisë, Nasip Naço është paraqitur ditën e sotme në Prokurorinë e Posaçme.

Ish-ministri i Drejtësisë Nasip Naço, i cili u paraqit në SPAK paraditen e sotme është shprehur se ishte thirrur për çështjen CEZ-DIA.

Afera CEZ-DIA fillon në vitin 2009, kur OSSH shiti 75% të aksioneve te CEZ-DIA, marrëveshje që do t’i kushtonte buxhetit të shtetit shqiptar 414 milionë euro dëm pas prishjes së njëanshme kur Partia Socialiste mori pushtetin.

Nasip Naço ka qenë Ministër i Drejtësisë nga viti 2013 deri në vitin 2015.

Ai ka mbajtur mandatin e deputetit të LSI-së për vitet 2009-2011 dhe 2012-2013, ndërsa në vitin 2021 është bashkuar me Partinë Socialiste.

Naço aktualisht është deputet i Partisë Socialiste në Kuvendin e Shqipërisë dhe kryetar i Komisionit të Sigurisë Kombëtare.