Ish-zv/kryeministri Ahmetaj i pandehur për aferën me inceneratorin e Elbasanit

Ish-zv/kryeministri Arben Ahmetaj është marrë i pandehur për aferën me inceneratorin e Elbasanit.

Ahmetaj është marrë i pandehur gjatë hetimeve që janë kryer lidhur me një nga fraksionet e dosjeve të hetimit për inceneratorin e Elbasanit.

Mbi të janë ngritur akuzat për pastrim parash, korrupsion dhe fshehje pasurie. Hetimet janë duke u kryer nga Altin Dumani dhe Enkeleda Millonai.

Për inceneratorin e Elbasanit, tre prej të akuzuarve, Klodian Zoto, Mirel Mërtiri dhe Stela Gugallja, janë dënuar në mungesë nga Gjykata e Posaçme Antikorrupsion.

Zoto u shpall fajtor për korrupsion aktiv dhe u dënua me 6.8 vite burg; Mirel Mërtiri u dënua me 6.8 vite burg dhe Stela Gugallja dënohet me 4.8 vite burg.

Lefter Koka u shpall i pafajshëm për shpërdorim detyre, por fajtor për korrupsion dhe pastrim parash, ndërsa u dënua me 5.8 vjet burg.

Nga ana tjetër gjykata shpalli të pafajshëm për shpërdorim detyre ish-deputetin socialist, Alqi Bllako.

Për dy të akuzuar të tjerë, Bardhyl Cabirin, i dënuar me 2 vjet, u urdhërua shuarja e masës dhe për Serafin Papën, i dënuar me 1.4 vite burg, u vendos shuarja e masës së arrestit shtëpiak.

Pëllumb Abeshi u shpall fajtor dhe u dënua me 2.8 vite burg. Jonida Zeqo u shpall fajtore dhe u dënua me 2.8 vite burg.