Ishte dënuar në Itali me 14 vite burg për tentativë vrasje, grabitje e kanosje arrestohet në Durrës

Një operacion i policisë i quajtur “Five Charges” në portin e Durrësit, ka bërë të mundur kapjen dhe vënien në pranga të një 52-vjeçari, të kërkuar nga Interpoli për 5 vepra penale.

Sipas njoftimit zyrtar të policisë, mësohet se, 52-vjeçari Pllum Daci, me banim në Kamëz, ishte person i shpallur në  kërkim ndërkombëtar nga Interpol Roma/Itali, me datë 27 korrik 2024.

“Bazuar në informacionet e marra se një shtetas në kërkim do futej në Portin e  Durrësit me qëllim tërheqjen e një automjeti të dërguar nga jashtë shtetit nga të afërm të tij , kanë organizuar dhe finalizuar operacionin policor të koduar  “Five Charges”.

Si  rezultat i  forcimit të kontrolleve të ushtruara në hyrje – dalje në PKK Port Durrës, në kuadër të operacionit  të koduar “Five Charges”, nga shërbimet e Stacionit te Policisë Kufitare Porti Durrës në bashkëpunim me Seksionin e Hetimit të Krimeve dhe Zbatimit të Masave Plotësuese për Kontrollin e Territorit, u   kap dhe u  arrestua me qëllim ekstradimi, shtetasi Pllum Daci, 52 vjeç, banues ne Kamëz, Tiranë”, thuhet në njoftimin e policisë.

Gjykata e Napolit/Itali e ka dënuar ketë shtetas me 14 vjet e 10 muaj burg (mbetur për te kryer 13 vjet e 9 muaj burg) për veprat penale “Tentativë vrasje” ” Grabitje” ” Kanosje” ” Vjedhje” dhe “Shfrytëzim prostitucioni” parashikuar nga nenet e Kodit Penal Italian. Interpol Tirana vijon bashkëpunimin me Interpol Romën, për ta ekstraduar këtë shtetas, në Itali.