Shkrimtari përjetësohet në bronz, aty ku ndalonte çdo ditë për kafenë

Ismail Kadare, figura emblematike e letërsisë shqipe, u përjetësua përmes një statuje, pikërisht në ambientin ku ai ndalonte çdo ditë për kafenë e tij dhe që prej vitesh ishte kthyer në një pikë takimi për admiruesit e shumtë të shkrimtarit.

Në një ceremoni të ngarkuar me emocion, botuesi Bujar Hudhri e përshkroi këtë hapësirë si një vend të pandarë nga jeta e Kadaresë. Ai theksoi se çdo cep i saj mbart kujtime personale dhe se monumenti nuk është thjesht një vepër arti, por një prani simbolike që do ta mbajë shkrimtarin gjallë mes njerëzve.

Edhe bashkëshortja e tij, Helena Kadare, u rikthye në këtë vend me mall, duke ndarë një moment intim pranë statujës, ashtu siç kishin bërë shpesh gjatë viteve.

Ideja për realizimin e skulpturës erdhi nga aktori Timo Flloko, ndërsa mbështetja e miqve të familjes Kadare bëri të mundur që vepra në bronz të merrte formë nga duart e skulptorit Henri Nimani.

Në këtë përvjetor, miq, familjarë dhe dashamirës kujtuan shkrimtarin që me veprën e tij kapërceu kufijtë, duke e bërë letërsinë shqipe të njohur dhe të respektuar në mbarë botën.