Kapet mashtruesja 30-vjeçare, si e futi në kurth një djalë dhe i mori 16.000 euro duke i bërë këtë premtim

Përditësuar më 1 Qershor 2022, 13:14

Të tjera detaje dalin në dritë në lidhje me arrestimin e 30-vjeçares Veriana Gega, e cila u prangos sot nga policia e Tiranës për mashtrim.

BW raporton se ndaj të resë ishin depozituar 40 kallëzime nga persona të ndryshëm, mes të cilëve edhe familjarë të vajzës.

Duke iu referuar hetimeve, rezulton 30-vjeçarja iu ka marrë qytetarëve shuma të mëdha parash duke i mashtruar me viza dhe punësime jashtë territorit shqiptar.

Shumica e qytetarëve të mashtruar janë nga qyteti i Tiranës dhe i Elbasanit.

Njoftimi nga policia Tiranë

Finalizohet operacioni policor i koduar “Promise”.

Operacioni, i zhvilluar nga Seksioni për Hetimin e Krimit Ekonomik dhe Financiar në DVP Tiranë, në bashkëpunim me Prokurorinë pranë Gjykatës së Shkallës së Parë Tiranë.

Përvetësonte shuma të konsiderueshme parash, me anë të mashtrimit dhe falsifikimit të dokumenteve, vihet në pranga 30-vjeçarja.

Specialistët e Seksionit për Hetimin e Krimit Ekonomik dhe Financiar në DVP Tiranë, në bashkëpunim me Prokurorinë pranë Gjykatës së Shkallës së Parë Tiranë, në vijim të punës për goditjen e paligjshmërisë, bazuar dhe në informacionet e marra mbi vendodhjen e një shtetaseje të shpallur në kërkim, organizuan dhe finalizuan me sukses operacionin policor të koduar “Promise”.

Në kuadër të këtij operacioni u bë kapja dhe ndalimi i shtetases:

– V. G., 30 vjeçe, banues në Berat, për veprat penale “Mashtrimi” dhe “Falsifikimi i dokumenteve”, të kryera në bashkëpunim.

Kjo shtetase dyshohet se me anë të mashtrimit dhe dokumenteve të falsifikuara, ka përfituar shumën 16000 euro nga një shtetas kosovar, me pretendimin se do t’i kryente atij, procedurat për pajisjen me pasaportë shqiptare.

Gjithashtu, nga hetimet ka rezultuar se kjo shtetase, nëpërmjet mashtrimit, ka përfituar shuma të ndryshme monetare, nga shtetas të ndryshëm në Republikën e Shqipërisë.

Vijon puna për identifikimin dhe kapjen e bashkëpunëtorëve të shtetases V. G.

Materialet i kaluan Prokurorisë pranë Gjykatës së Rrethit Gjyqësor Tiranë, për veprime të mëtejshme procedurale.