KATËR KUSHTE QË DUHET TË PLOTËSOJË DR. ULSI MANJA PËR TU BËRË PRESIDENT I SHBA

Deklaratat e socialistëve të rilindur të kupolës se Gjermania e mbylli përfundimisht atë muhabetin e vjetër të çeljes së negociatave, deklarata të shoqëruara me tone euforike e festive, nuk na ka lënë shteg tjetër veçse të kërkojmë karriget tona në BE dhe të porositim orkestrën e dasmës. Biles Rama e bëri aq fakt të kryer sa vazhdoi stilin e vet konfidencial të komunikimit me një autoritet global siç është znj. Merkel duke shkruar në twitter: faleminderit, Angela. Njëlloj sikur të ish duke i shkruar në inbox Inës, personazhit të famshëm të veprës së vet madhore ”Ina, Ina hiqi brekët”. Në fakt, ky lloj egzaltimi primitiv, kompleksual dhe inkorrekt nuk është i panjohur në mënyrën e sjelljes diplomatike të Edi Ramës.

Kështu i thërret dhe presidentit serb, Sandër, paçka se me këtë të fundit konfidencat janë mëse të justifikuara. Në kuadrin e festimeve me rastin e hapjes së negociatave, dr. Taulanti shkoi në Gjermani enkas për t’i falenderuar grupet parlamentare të CDU/ CSU. Jam shumë i lumtur për hapjen e negociatave, thoshte dr. Balla. Madje, bashkë me shefin e madh shprehnin besimin e plotë se edhe grupet e tjera parlamentare gjermane do të ndiqnin shembullin e tyre. Me pak fjalë, hapja e negociatave për Shqipërinë tani shpejt, është shumë më e sigurtë se tërmeti që ra para pak ditësh.

Kaq tha tellalli i Surrelit. Mirëpo nëse e lexon normalisht tekstin gjerman, do befasohesh nga leximi anormal që i kanë bërë me dashje si artisti parismahnitës, si dr. Balla. Në atë tekst thuhet që e mbështesim fuqimisht Shqipërinë, nuk thuhet mbështesim fuqimisht çdo gjë që thotë ERTV. Gjermania është aleat i natyrshëm dhe një partnere e jashtëzakonshme e jona por, mbështetjen na e japin duke marrë parasysh përmbushjen e 9 kushteve shumë të rëndësishme. Më saktë të 9 kushteve nga 7 që ishin më parë. Ndërkohë që sa më i madh bëhet numuri i kushteve të vëna nga Evropa, aq më e shumëngjyrshme bëhët festa e ”fitorjes” në Surrel.

E bukura është se kushtet janë vënë dhe shtuar pikërisht nga thellimi i mosmbarëvajtjes së demokracisë dhe i krizës politike të shkaktuar pikërisht nga keqqeverisja ku bën pjesë dhe dr. Taulani që ka shkuar t’i falenderojë. Kushtet që në fakt përbëjnë vetë lendën e rezervave të Evropës ndaj Shqipërisë janë reforma e gjyqësorit me ç’rast kërkohet fillimi i proçedurave penale ndaj gjyqtarëve dhe prokurorëve të korruptuar si dhe një vendim i Kushtetueses lidhur me statusin e 30 qershorit. Që të dyja këto, janë gurë në shpinën e qeverisë.

Pra, Gjermania është pro hapjes së negociatave por me këto 9 kushtet e vogla. Kjo është njësoj sikur t’i thuash dr. Ulsit që ke mbështetjen e fuqishme të popullit amerikan për t’u bërë president i SHBA vetëm nëse plotëson 4 kushte të vogla : të jesh biond natyral kaçurrels, të kesh 30 miliard USD, të kesh lindur në Shangai dhe të ta quajnë gjyshin Johnson.