Kavaje/ Si nisi sherri banal me thikë dhe armë 

Një sherr banal në një prej lokaleve në qendër të Kavajës çoi në vdekjen e dy personave. 

Altin Rexha dhe Edmond Gosa humbën jetën në spital, pas plagëve të marra. Nga verifikimet e sakta të kryera nga grupi hetimor, pas gjetjes së dokumenteve të identifikimit, Altin Rexha e ka ndryshuar emrin dhe në dokumente e ka Sali Rexha.

Sipas burimeve të gazetares së Top Channel, Dorjana Bezat sherri banal ka qenë i çastit, situatë e cila ka agravuar deri në vrasje.

Njëri prej viktimave ka humbur jetën pasi është qëlluar me armë, ndërsa personi tjetër u qëllua me thikë.

Rezulton se të dy viktimat kanë të shkuar kriminale dhe nuk janë të panjohur për uniformat blu.

Njoftimi i policisë:

Kavajë/Informacion paraprak

Më datë 29.03.2023, në Kavajë, tek kryqëzimi i valutës, ka ndodhur një konflikt midis dy shtetasve, ku shtetasi Edmond Gosa 43 vjeç, ka plagosur me thikë shtetasin Altin Rexha, 43 vjeç, ndërsa ky i fundit ka plagosur me armë zjarri shtetasin Edmond Gosa. Si pasojë e plagëve të marra të dy shtetasit e përfshirë në konflikt, kanë ndërruar jetë në spital.

Grupi hetimor ndodhet në vendngjarje dhe po punon për sqarimin e rrethanave të ngjarjes. Në përfundim të veprimeve paraprake në vendngjarje, do të kemi një informacion vijues.