Këlliçi akuza ndërkombëtarëve për reagimet e djeshme: Ishin të turpshme, xhamat e thyer do ja u çojmë vetë

Ish-deputeti i PD-së, Belind Këlliçi duke folur për protestën e opozitës para Bashkisë së Tiranës, tha se protestuesit e arrestuar po mbahen pa asnjë motiv.

Por ai foli edhe për reagimet ndërkombëtare për protestën, duke i quajtur të turpshme dhe qesharake, pasi aty nuk ka patur dhunë.

“Në mënyrën më të turpshme dhe qesharake, reagimet e selive diplomatike ditën e djeshme flasin për një dhunë që është ushtuar në protestën ditën e djeshme ku dhe vetë në deklaratën e policisë së Shtetit shihet qartë që nuk ka asnjë të lënduar nga asnjëra palë.

Pra unë nuk e di se si mund të konsiderohet një protestë e dhunshme ku në bilancin e saj nuk ka asnjë person që të mund të jetë dëmtuar.

Nëse janë kaq të shqetësuar komuniteti ndërkombëtar dhe policia e shtetit për dy xhama që janë thyer në bashkinë e Tiranës, po ja cojmë ne dhe po i zëvendësojmë meqë kanë hallin e taksave publike.

Por të thonë një fjalë për 130 milionë euro që janë vjedhur tek inceneratori i Tiranës.

Të thonë një fjalë për 30 milionë euro që kanë vjedhur drejtorët e Erion Veliajt në bashki me kompaninë e tyre 5D.

Dhe të thuhet një fjalë për korrupsionin endemik që ndodh në bashkinë e Tiranës”, tha Këlliçi në Ora News.