Kërkesa për të larguar Bashën është e lehtësisht e kuptueshme

Genc Sejko

Le ta amnistojmë për një moment nga të gjitha gabimet dhe fajet që ka bërë si lider i opozitës dhe ta analizojmë situatën vetëm në aspektin praktik.

Ka humbur dy palë zgjedhje për pushtetin qëndror e nuk ka shpjeguar akoma se si ka ndërmend të fitojë zgjedhjet e ardhshme. Nëse Rama i vodhi ose i bleu zgjedhjet, kush është mekanizmi që Basha ofron që ky fenomen të mos përsëritet?
Basha nuk e ka një mekanizëm të tillë. Po ta kishte do ta kishte përdorur në zgjedhjet e Prillit. Në këto kushte kërkesa për largimin e Bashës nga posti i kryetarit është plotësisht e justifikuar.

Të kthehemi tek Berisha. Po ashtu si Bashën le ta amnistojmë edhe atë nga gabimet e fajet. Le ta marrim të mirëqenë se beteja nuk është personale por për të mirën e partisë dhe të opozitës.
Si e ndihmon kthimi i Berishës PD-në dhe opozitën? Sa gjasa ka që Berisha të fitojë kundër Ramës? A nuk është Berisha mbështetësi kryesor i parimit se ‘Kush humb zgjedhjet jep dorëheqjen e largohet’? A nuk humbi Berisha zgjedhjet me Ramën në 2013? Madje Berisha humbi zgjedhjet që kishte organizuar vetë.
Sa perqind e elektoratit gri (pa te cilin nuk vjen dot ne pushtet) do votonin PD-në e udhëhequr nga Berisha?

Kam pritur me durim ditën që Berisha do dilte e do deklaronte se, kjo betejë ka si qëllim hapjen e partisë dhe jo kthimin e tij në krye të saj. Kthimi i tij në krye të PD-së verteton se beteja nuk është parimore por personale.

Me keqardhje ju them atyre që e ndjekin se, Berisha nuk është zgjidhja. Ai që nuk ishte zgjidhje në 2013 nuk mund të jetë zgjidhje në 2021, e as në 2025.

PD-ja dhe opozita kanë nevojë për një ri-themelim dhe një hapje të madhe. Këtë proces nuk mund ta udhëheqë ai që në 2013 u largua me votë.

Kam një dobësi për Berishën. Kjo pasi unë i përkas një gjenerate që ndoshta gabim e lidh Berishën me rrëzimin e diktaturës. Do kisha dashur që ‘doktori’ të ishte larguar që në 2013 nga jeta politike e të kishte hapur një garë të lirë për kreun e PD-së, kështu të gjithë do kishim qenë më mirë sot. Unë do vazhdoj ta mbështes opozitën, pavarsisht se kush do jetë në krye të saj, pasi për mua opozita është mekanizmi i vetëm që kemi për largimin e kësaj qeverie dhe iu bëj thirrje edhe ju që ta mbështesni atë. Por dua që të shënohet që unë nuk e mbështes një lëvizje që sjell në krye të opozitës Berishën.

Për ta mbyllur kam vetëm një pyetje që do doja që ta lexonte Berisha edhe pse e di që nuk ka për ta lexuar. Është një pyetje që ka shqetësuar edhe të tjerë përpara meje.

Doktor, ç’do bëhet me Romën kur të vdesë Çezari?