Komisioni hetimor parlamentar për shkarkimin e presidentit Ilir Meta do t’i nisë letër Komisionit të Venecias

Komisioni hetimor parlamentar për shkarkimin e presidentit Ilir Meta do t’i nisë sot një letër Komisionit të Venecias, për rrugën që duhet të ndjekë në mungesë të Gjykatës Kushtetuese.

Komisioni i Venecias është pjesë e organeve të Këshillit të Evropës, dhe funksionon si një institucion që shërben për të këshilluar vendet anëtare të KiE në lidhje me çështjet kushtetuese.

Komisioni hetimor parlamentar për shkarkimin e presidentit Meta u ngrit rreth një muaj pas dekretit për anulimin e zgjedhjeve vendore të 30 qershorit. Deputetët pretendojnë se, me veprimet e tij, presidenti Meta ka shkelur rëndë dispozitat kushtetuese.

Por, sipas parashikimeve ligjore në fuqi, përfundimi i komisionit hetimor parlamentar, para se të votohet në Kuvend, duhet miratuar paraprakisht nga Gjykata Kushtetuese, e cila për momentin mungon. Në këto kushte, për ta tejkaluar këtë ngërç, Kuvendi do t’i dërgojë një letër Komisionit të Venecias.