Konflikti me thika në Elbasan/ Arrestohet autori që vrau 28-vjeçarin dhe i plagosi të vëllanë! 24-vjeçari pranon krimin

Vetëm pak orë pas sherrit që i mori jetën Florenc Kovaçit mbrëmjen e sotme në Elbasan, policia ka identifikuar dhe arrestuar autorin e ngjarjes.

Korrespondenti  ynë në Elbasan  mëson se në pranga është vendosur një 24-vjeçar, identiteti i të cilit nuk bëhet ende i ditur.

Mësohet se ai ka pranuar krimin përpara uniformave blu. Gjithashtu policia gjeti dhe thikën me të cilin 24-vjeçari qëlloi Florenc Kovaçin dhe plagosi vëllain e tij, Mikel Kovaçin.

Ngjarja

Sherri ka ndodhur mbrëmjen e sotme rreth orës 19:50 në lagjien “Qemal Stafa” në Elbasan. Dy vëllezërit Mikel dhe Florenc Kovaçi janë konfliktuar me disa të rinj të tjerë.

Sherri ka degraduar deri në përdorimin e armëve të ftohta, ku 24-vjeçari i arrestuar, goditi dy vëllezërit. Fatkeqësisht Florenc Kovaçi nuk mundi t’i mbijetonte plagëve të marra.

I vëllai i tij, Mikel Kovaçi është transportuar në Spitalin e Traumës në Tiranë për ndihmë më të specializuar mjekësore.

Deri më tani dyshohet se arsyeja e sherrit ka nisur për një vajzë por ende nuk kemi një sqarim zyrtar nga policia.