Koronavirusi i merr jetën aktorit fierak

Koronavirusi i ka marrë jetën një tjetër aktori. Bëhet fjalë për aktorin e njohur të teatrit dhe estradës së Fierit, Fatmir Xhelili.

Mësohet se aktori ka ndërruar jetë sot në moshën 69-vjeçare, ndërsa prej disa ditësh ka qenë në intubim. Xhelili ishte shtruar në spitalin Infektiv prej disa ditësh, por gjendja e tij ishte renduar.

Ndërkohë pak ditë me parë betejën me Covid e humbi aktori i njohur i humorit Koço Devole.

ROLET

Fatmir Xhelili ka interpretuar gjatë karrierës së tij rreth 180 role në dramë dhe komedi, ku është vlerësuar edhe me  4 çmime të para si aktori më i mirë.

Disa nga komeditë që ai ka interpretuar rolet kryesore janë “Dy dyzina me trëndafila”, “Fejesa” e Chehovit, “Një budalla e gjysmë”, “I burgosuri i katit 15” etj. Gjithashtu edhe në dramat “Pazari”, “Vite të paharruara”, “Fqinjët”, disa prej të  cilave me regji të Serafin Fankos, Dhimitër Orgockës, Gëzim Kamës, etj.