Kosotja dhe detajet, Kushner prezanton planin për rindërtimin e Gazës

Një ide e re për të ardhmen e Rripit të Gazës, e cilësuar nga vetë Donald Trump si një territor me potencial të jashtëzakonshëm, u prezantua nga Jared Kushner gjatë një aktiviteti të organizuar nga i ashtuquajturi “Këshilli i Paqes” në Davos. Plani synon një transformim rrënjësor të zonës, duke e shndërruar nga një territor i shkatërruar nga lufta në një hapësirë zhvillimi ekonomik dhe urban.

Sipas projektit, rindërtimi do të nisë nga pjesa jugore e Gazës dhe kërkon një angazhim financiar minimal prej rreth 25 miliardë dollarësh. Kushner paraqiti vizionin e tij si një qasje të bazuar te siguria afatgjatë, çmilitarizimi i territorit përmes çarmatimit të Hamasit dhe aplikimi i parimeve të tregut të lirë si motor zhvillimi.

Plani është konceptuar në katër etapa të njëpasnjëshme, që fillojnë nga Rafahu, shtrihen drejt Khan Younis dhe përmbyllen në Qytetin e Gazës. Sipas Kushner, rindërtimi nuk është thjesht fizik, por synon edhe ndryshimin e modelit ekonomik dhe social të zonës.

Në prezantimin e tij, ai renditi disa nga shtyllat kryesore të projektit, mes të cilave bashkëpunimi për çmilitarizimin e territorit, ulja e varësisë së Gazës nga ndihmat ndërkombëtare, ndarja e zonës në hapësira rezidenciale dhe zona turistike përgjatë bregdetit, si dhe ndërtimi i rreth 100 mijë banesave të reja në Rafah dhe në atë që ai e quajti “Gaza e Re”.

Gjatë fjalimit, Kushner shfaqi slajde që ilustronin procesin e rindërtimit hap pas hapi, duke nisur nga jugu i territorit. Sipas tij, Rafahu, i cili u godit rëndë gjatë operacioneve ushtarake izraelite kundër Hamasit, mund të rikthehet në funksion brenda një periudhe dy deri në tre vjet.

Vlera totale e projektit për të gjithë Rripin e Gazës, sipas përllogaritjeve të para, arrin të paktën 25 miliardë dollarë. Megjithatë, ende nuk është bërë e qartë se cilët aktorë do të marrin përsipër financimin e kësaj nisme ambicioze.