Kosovë, konfrimohet edhe 26 raste me koronavirus

26 raste të tjera janë konfirmuar ditën e djeshme, ku 11 prej tyre janë të së njëjtës familje.

Lajmi është konfirmuar edhe nga Instituti Kombëtar i Shëndetësisë Publike të Kosovës, që njofton se familja e prekur është nga Gjilani, ndërsa 14 raste janë nga komuna e Malishevës, ndërsa 1 tjetër nga Gjakova.

“Sonte me 23.03.2020 në Laboratorin e Mikrobiologjisë Molekulare në IKSHPK me metodën RT-PCR, janë testuar njëqind (100) mostra të marra në hulumtim të personave që kanë qenë në kontakt të afërt me rastet e konfirmuara dhe të gjithë kanë qenë në vetë izolim, përveç një rasti nga fshati Panorc, Malishevë, i shtrirë në Klinikën Infektive. Testimi në numër kaq i madh është bërë me qëllim të gjurmimit të të gjitha kontakteve të rasteve të konfirmuara të cilat janë gjetur në mënyrë proaktive nga ekipet e IKShPK. Nga këto mostra të marra për testim në virusin SARS-CoV, njëzet e gjashtë (26) prej tyre kanë rezultuar pozitive.

Nga 26 rastet e konfirmuara të gjitha janë kontakte të gjurmuara të rasteve pozitive (familjarë dhe kontakte të ngushta), të detektuara përmes hulumtimit aktiv epidemiologjik. Prej tyre 14 raste janë nga komuna e Malishevës, 11 raste nga Gjilani dhe 1 rast nga Gjakova”, thuhet në njoftimin e IKSHPK-së.

Deri më tani, nga data 08.02.2020, në Laboratorin e Mikrobiologjisë Molekulare në IKSHPK me metodën RT-PCR, janë testuar gjithsej 690 mostra të dyshimta në virusin SARS-CoV-2 dhe prej tyre, 61 raste kanë rezultuar pozitive, ndërsa ka patur edhe një viktimë, i moshës 82 vjeç.