Pjesëmarrja e emigrantëve në zgjedhjet e 2025 – Shpresë për ndryshim apo sfidë për sistemin?

Për herë të parë në historinë e Shqipërisë, emigrantët do të kenë të drejtën e votës në zgjedhjet parlamentare të 11 majit 2025, një zhvillim që mund të ndikojë ndjeshëm në rezultatin e zgjedhjeve dhe përfaqësimin politik të vendit. Procesi i regjistrimit ka nisur më 11 janar dhe do të zgjasë deri më 4 mars, me një pjesëmarrje relativisht të lartë deri tani.

Numrat dhe tendencat: Kush po voton nga jashtë?

Sipas Komisionit Qendror të Zgjedhjeve (KQZ), deri më 4 shkurt janë plotësuar 141,435 kërkesa për regjistrim, nga të cilat 69% janë miratuar, ose rreth 87,596 votues të sigurtë nga diaspora. Këto të dhëna tregojnë një interes të konsiderueshëm të emigrantëve për të marrë pjesë në procesin zgjedhor, por edhe një shkallë të lartë refuzimesh, pasi 36% e kërkesave janë hedhur poshtë.

Në terma gjeografikë, Italia dhe Greqia dominojnë procesin, me 33% dhe 25% të kërkesave të miratuara, ndjekur nga Gjermania (13%), SHBA (10%) dhe Anglia (8%). Kjo shpërndarje pasqyron vendet ku komuniteti shqiptar është më i madh dhe ku interesi për pjesëmarrje në zgjedhje është më i lartë.

Nga ana demografike, grupmosha më aktive është ajo nga 26 deri në 35 vjeç (28%), e ndjekur nga grupmosha 36-45 vjeç (27%). Ky fakt tregon se pjesëmarrja në votime nga emigrantët nuk është vetëm një çështje simbolike, por një interes i vërtetë i brezit të ri për të ndikuar në politikën shqiptare.

Problemet dhe sfidat e procesit

1. Shkalla e lartë e refuzimeve – Me 36% të kërkesave të hedhura poshtë, shqetësimi kryesor është se një pjesë e konsiderueshme e emigrantëve nuk do të mund të votojnë. Pjesa më e madhe e refuzimeve vijnë nga Italia (46%) dhe Greqia (27%), çka sugjeron probleme me dokumentacionin apo procedurat e regjistrimit. Nëse kjo normë mbetet e lartë, procesi mund të cilësohet i pasuksesshëm në përfshirjen e plotë të diasporës.