Kreu i BKH, dy kandidatë para makinës së të vërtetës

Dy nga kandidatët për drejtimin e Byrosë Kombëtare të Hetimit iu nënshtruan dje testit poligrafik, ose i njohur si testi i së vërtetës.

Kandidatët Lindita Nushi dhe Gentian Shehaj, për rreth dy orë u janë përgjigjur pyetjeve përballë makinës së të vërtetës, ndërsa në ditët në vazhdim, deri të premten do të kalojnë testin edhe 6 pretendentët e tjerë.

Pas përmbylljes së kësaj faze do të kryhet verifikimi i figurës e pasurisë dhe intervistimi përfundimtar. Në fillim të garës shprehën interes 40 aplikantë për të marrë drejtimin e njësisë më të rëndësishme hetimore që po krijohet si rezultat i Reformës në Drejtësi, por numri u përgjysmua pas verifikimit të kushteve dhe kritereve ligjore, nga një komision me tre prokurorë të Strukturës së Posaçme Antiko-rrupsion(SPAK).

Pas testeve fizike, numri i kandidatëve shkoi në 8 dhe 7 prej tyre janë nga radhët e Policisë së Shtetit me karrierë të gjatë dhe një prej tyre prokuror. Pas përzgjedhjes së kreut, do të vazhdohet me rekrutimin e hetuesve të kësaj njësie, të cilët pritet të trajnohen nga akademia e FBI-së në Virxhinia të Shteteve të Bashkuara të Amerikës.

KANDIDATËT

Zëvendësdrejtuesja e Policisë së Shtetit, Aida Veizaj, është një prej kandidatëve që ka kaluar me sukses fazat e para. Veizaj më herët ka qenë drejtuese e Kufirit dhe Migracionit, drejtuese e Drejtorisë për Hetimin e Pastrimit të Parave dhe jo vetëm. Ardian Çipa është kandidati tjetër që pret të kalojë në makinën e së vërtetës. Çipa ka qenë drejtues në Drejtorinë e Përgjithshme për Hetimin e Krimit të Organizuar dhe Krimeve të Rënda, ndërsa aktualisht është në Sektorin për Mbrojtjen e Dëshmitarëve. Gentjan Shehaj është një tjetër kandidat nga radhët e Policisë.

Shehaj ka drejtuar Policinë e Vlorës, ndërsa në mars të 2019-ës është larguar për të marrë një detyrë në Akademinë e Sigurisë. Lindita Nushi, gruaja e dytë në listën për drejtimin e BKHsë, vjen gjithashtu nga radhët e Policisë. Nushi ka drejtuar Drejtorinë Rajonale të Kufirit dhe Migracionit në Durrës. Idajet Faskaj, gjithashtu pjesë e Policisë, ka qenë drejtues i Departamentit të Krimit të Organizuar. I vetmi që vjen nga radhët e Prokurorisë është Ylli Pjetërnikaj. Ky i fundit ka nisur detyrën në Prokurorinë e Kukësit, ndërsa aktualisht është në Prokurorinë e kryeqytetit.

KRITERET

Kandidatët e pranuar janë diplomuar për Drejtësi ose kanë arsim të lartë policor. Kanë pasur të paktën 5 vite eksperiencë pune si prokurorë ose punonjës Policie, në luftën kundër korrupsionit dhe krimit të organizuar. Gjithashtu, të 18 kandidatët kanë firmosur deklaratë për dhënien e pëlqimit të tij dhe familjarëve të tij, që heqin dorë nga privatësia. Në kushtet kur kërkojnë të jenë pjesë e BKH-së, ata duhet të jenë dakord me kontrollin e llogarive dhe telekomunikimeve vetjake.

KANDIDATËT

1. Aida Veizaj
2. Ardian Çipa
3. Artur Beu
4. Ervin Hodaj
5. Gentjan Shehaj
6. Lindita Nushi
7. Idajet Faskaj
8. Ylli Pjetërnikaj