Kryemadhi: Rama qesharak, mashtroi edhe për pronat e çamëve

Kryetarja e LSI, Monika Kryemadhi, nuk është kursyer ndaj Kryeministrit Edi Rama, pasi mediat greke zbuluan mashtrimin e qeverisë se çështja çame as nuk ishte pranuar për t’u diskutuar në takimet që kanë pasur palët së fundmi.

Kryemadhi ka gjetur rastin t’i kundërpërgjigjet për “habinë” plot ironi të Ramës se pse LSI nuk votoi për aeroportin e Vlorës. Sipas saj, gjithçka është asgjë më shumë sesa mashtrim

“Mashtroi për Vlorën, mashtroi për ilaçet, mashtroi edhe për pronat e çamëve, – u shpreh Kryemadhi në Fb. – Ky njeri nuk ka me asnjë forcë të ngrihet mbi mashtrimet e tij, pavarësisht se ndjen kënaqësi kur mashtron shqiptarët. Sa qesharak që është!”

Më herët, ishte kryetari i Grupit të LSI, Petrit Vasili, i cili demaskoi një tjetër mashtrim të Kryeministrit: faktin që në Spitalin Onkologjik nuk ka medikamente për të sëmurët, pavarësisht videove propagandistike të publikuara nga kreu i qeverisë.