Kryesia e Partisë Demokratike miraton 4 pika

Pas më shumë se dy orësh debate, kryesia e Partisë Demokratike ka miratuar 4 pikat e rendit të ditës.

E para, shqyrtimi i përmbledhjes së analizës për masakrën zgjedhore të 25 prillit për fazën e parë të saj.

E dyta, shqyrtimi i ndryshimeve për statutin e PD.

E treta, miratimi i urdhrit për ngritjen e komisionit të votimit dhe numërimit për zgjedhjen e anëtarëve të Këshillit Kombëtar në mbledhjen e datës 17 korrik.

E katërta, lidhet me njoftimin nga kryetari i Partisë për listën që do ti propozojë për votim për kandidatët për anëtarë të Këshillit Kombëtar.

MBLEDHJA U SHOQERUA ME DEBATE

Më herët pati debate mes drejtuesve politike dhe sekretarit të përgjithshëm Gazment Bardhi për mënyrën e hartimit të dokumentit të analizës së humbjes së zgjedhjeve të 25 prillit.

Edmond Spaho është shprehur i pakënaqur me analizën përfundimtare për qarkun që ai përfaqësonte. Sipas tij, ai e arriti objektivin, duke marrë 5 mandate.

Ndërsa Edi Paloka u shpreh se ai dokument duhet ndryshuar.

Nga ana e tij, Sekretari i Përgjithshëm, Gazment Bardhi ka deklaruar se metodologjia e analizës nuk është bërë nga ai, por është bërë sipas një plani nga konsulentët.

PJESE NGA DEBATI NE KRYESIN E PD

Edi Paloka: Ky dokument nuk është realist. Nuk pasqyron ate qe drejtuesit politik kane shkruar ne raportet e tyre. Duhet ndryshuar dokumenti, nuk mund ta miratojmë në këtë mënyre si është hartuar

Edmond Spaho: Aty në raport z.Bardhi thua qe Korça nuk ka dalë brenda pritshmërive? Si e shpjegon? Unë kam bërë tjetër analizë. Kam marrë rezultatin më të mirë. Kam pasur objektiv 5 mandate kam fituar 5 mandate

Gazment Bardhi: Metodologjia e analizës nuk është bërë nga unë, por është bërë sipas një plani të bërë nga konsulentët. Mbi bazën e asaj metodologjie është bere analiza.

Fatbardh Kadilli: Duhet parë me kujdes rezultati. Dikush më mirë, dikush më keq. Raporti sa i përket faktorëve të jashtëm është i mirë, ndërsa për faktorët e brendshëm nuk kanë dalë evidente, ndërkohë që duhet të kishin dalë.

Gazment Bardhi: Analizën për faktorët e brendshëm, degë më degë do e bëjmë në një fazë të dytë, në shtator.

Fatbardh Kadilli: Në këtë analizë nuk përmenden problematikat që kanë lidhje me përformancën e PD-së, si reagoi struktura, koha e daljes në terren, cilësia e listave.