Lëvizja e papritur, Blendi Fevziu i futet futbollit

Shoqata Rajonale e Futbollit Shkodër zhvilloi Asamblenë e Përgjithshme Zgjedhore për vitin 2026, me pjesëmarrjen e 27 delegatëve, ku u morën vendime të rëndësishme për drejtimin e shoqatës dhe përfaqësimin në strukturat e Federatës Shqiptare të Futbollit.

Me votim unanim, Lazer Matija u rizgjodh kryetar i Shoqatës Rajonale të Futbollit Shkodër, duke marrë një mandat të ri katërvjeçar. Asambleja vlerësoi vijimësinë e punës së kryesisë aktuale dhe angazhimin për zhvillimin e futbollit në rajon.

Gjatë punimeve, delegatët shqyrtuan edhe propozimet për drejtimin e FSHF-së. Me vendim unanim, asambleja miratoi propozimin e Armand Dukës si kandidat për postin e Presidentit të Federatës Shqiptare të Futbollit, duke theksuar mbështetjen për vazhdimësinë e projekteve ekzistuese në nivel kombëtar.

Një tjetër vendim i rëndësishëm ishte edhe propozimi i anëtarëve për Komitetin Ekzekutiv të FSHF-së. Delegatët votuan në favor të Blendi Fevziut, gazetar dhe drejtues i emisionit “Opinion”, si kandidat për këtë strukturë drejtuese, duke synuar prurje të reja dhe kontribut të zgjeruar në menaxhimin e futbollit shqiptar.

Asambleja përcaktoi gjithashtu delegatët që do të përfaqësojnë rajonin e Shkodrës në Asamblenë e Përgjithshme të FSHF-së, ndërsa u miratuan raporti i aktivitetit, pasqyrat financiare dhe buxheti për vitin 2026.

Punimet u mbyllën me zotimin e kryesisë për transparencë, bashkëpunim me klubet e rajonit dhe forcim të mëtejshëm të strukturave të futbollit vendor.