Lukashenko i hap dyert Maduros: Lëre Venezuelën, eja në Bjellorusi

Presidenti bjellorus Alexandër Lukashenko deklaroi se presidenti i Venezuelës, Nicolas Maduro, është i mirëpritur në Bjellorusi në rast se do të largohej nga detyra. Ai theksoi se diskutime të tilla nuk janë zhvilluar ende me Maduron.

Lukashenko, aleati i ngushtë i presidentit rus Vladimir Putin, tha se Bjellorusia dhe Venezuela kanë marrëdhënie të gjata dhe se Maduro nuk ka qenë kurrë armik apo kundërshtar për vendin e tij. “Nëse ai donte të vinte në Bjellorusi, dyert për të janë të hapura”, citohet të ketë thënë Lukashenko në fragmente të intervistës të publikuara në kanalin Pul Pervogo në Telegram.

Deklarata vjen në një kohë tensioni të lartë midis SHBA-së dhe Venezuelës, me praninë e një grupi të madh ushtarak amerikan në Karaibet jugore, sulme ndaj anijeve të dyshuara për trafik droge, dhe komente nga presidenti amerikan Donald Trump se operacionet tokësore mund të fillojnë së shpejti në Venezuelë.

Qeveria e Venezuelës ka reaguar duke theksuar se SHBA-të po përpiqen të ndërhyjnë për të ndryshuar regjimin dhe për të marrë kontrollin mbi rezervat e mëdha të naftës së vendit.