Marina franceze vendos rekord në luftën kundër drogës! 9.6 tonë kokainë në Afrikën Perëndimore

Një ngarkesë masive kokainë është kapur në brigjet e Afrikës Perëndimore nga Marina franceze, duke vendosur një rekord të ri për operacionet e këtij viti. Autoritetet njoftuan mëngjesin e sotëm (25 shtator) se 9.6 tonë kokainë, me vlerë tregu prej më shumë se 500 milionë eurosh, u sekuestruan nga një anije peshkimi që nuk mbante flamurin e asnjë vendi.

Operacioni u krye nga dy anije të Marinës Franceze, në bashkëpunim me shërbimet antidrogë, inteligjencën detare dhe policinë britanike, në kuadër të misionit “Corymbe”, i krijuar në vitin 1990 për të mbrojtur sigurinë detare në Gjirin e Guinesë, një zonë e njohur për aktivitetet e piraterisë.

Derisa ende nuk janë dhënë detaje mbi fatin e ekuipazhit të anijes, pritet që droga të shkatërrohet, ndërsa anija të vazhdojë lundrimin e saj.

Ky operacion është arritja më e madhe e Marinës Franceze për vitin 2025. Deri në gusht, forcat detare kishin sekuestruar rreth 6 tonë kokainë në të njëjtin rajon. Admirali Nicolas Bozour, kreu i Marinës Franceze, tha se viti 2025 është tashmë një vit rekord, me mbi 45 tonë drogë të zbuluara dhe të sekuestruara nga forcat detare franceze.