Materniteti në Pogradec, si në kohën e mesjetës (Video)

Një qytetare nga Pogradeci ka ngritur një shqetësim serioz për kushtet e papranueshme në maternitetin e qytetit, duke e cilësuar situatën si alarmante për një institucion shëndetësor që duhet të kujdeset për jetën e nënave dhe foshnjave të porsalindur.

Qytetarja thekson se materniteti i Pogradecit është në një gjendje të degraduar, me mure të lagura, suva të rëna, tualete jashtë funksionit dhe mungesë totale të higjienës. Ajo ka shpërndarë pamje tronditëse nga ambientet e brendshme të maternitetit, duke ngritur pyetje mbi standardet e kujdesit shëndetësor në një periudhë kur Shqipëria aspiron të bëhet pjesë e Bashkimit Europian.

Kjo situatë ka nxitur një shqetësim të madh për mungesën e investimeve në spitale dhe maternitetet rajonale, që mbetet një plagë e vjetër e sistemit shëndetësor shqiptar. Qytetarët, të ekspozuar ndaj kushteve të papërshtatshme për trajtim dhe lindje, kërkojnë ndërhyrje të menjëhershme nga autoritetet për të përmirësuar kushtet në këto institucione.

Qytetarja, në denoncimin e saj në JOQ, kërkon veprime konkrete dhe urgjente nga Ministria e Shëndetësisë dhe institucionet përgjegjëse për të inspektuar dhe përmirësuar gjendjen e maternitetit.

Ajo e përfundon denoncimin me një pyetje të drejtpërdrejtë: “Si mund të lihet në këtë gjendje katastrofike, pa higjienën minimale, kur shteti pretendon të hyjë në BE?”

Denoncimi i qytetares është një thirrje për përgjegjshmëri dhe përmirësim të kushteve të jetesës dhe trajtimit në institucionet shëndetësore të vendit.