Mbërrijnë mbi 500 mijë doza të vaksinës Pfizer në Kosovë

Këtë të hënë në Kosovë kanë mbërritur 556.920 doza të vaksinës Pfizer kundër koronavirusit.

Sipas autoriteteve kosovare, me mbërritjen e këtyre dozave, imunizimi masiv do të përshpejtohe dhe të arrihet objektivi i qeverisë për vaksinimin e 60% të popullsisë.

“Prej këtij kontigjenti, 503 100 doza janë pjesë e donacionit të SHBA për Kosovën, të cilat në Kosovë kanë arritur përmes mekanizmit COVAX, ndërsa 53.820 doza të tjera janë nga marrëveshja bilaterale për vaksina kundër COVID-19 midis Ministrisë së Shëndetësisë dhe kompanisë Pfizer”, thuhet në njoftim.

Më 1 shtator, ministri i Shëndetësisë, Arben Vitia, pati njoftuar se 133,234 doza të vaksinës AstraZeneca kundër koronavirusit janë hequr nga përdorimi, për shkak të skadimit të afatit. Vaksinat kanë qenë pjesë e një donacioni nga Norvegjia.

Numri i qytetarëve të Kosovës të vaksinuar me nga dy doza të vaksinës kundër koronavirusit ka arritur në 315.880.  Numri total i vaksinave të administruara është 934.956.