Artisti shumëdimensional Timo Flloko mblodhi artistë të njohur në arenën kombëtare e ndërkombëtare për të interpretuar bashkë me ta disa nga poezitë e tij më të ndjera, në një mbrëmje nën regjinë e muzës së tij, Vera Grabocka. Linda mori rolin e të atit dhe surprizoi të gjithë të pranishmit në Butrint. Ajo u shfaq në skenë me një fustan të bardhë të gjatë dhe interpretoi disa vargje nga poezia “Zogjtë”.
Në mbrëmjen e veçantë, një nga stacionet e sezonit veror “KultArt 2023”, organizuar nga Ministria e Kulturës, Timo Flloko intepretoi i shoqëruar me violinë nga drejtoresha e Përgjithshme e TKOB-së, Abigeila Voshtina, dhe në piano nga Herta Cane.
Në skenë interpretuan gjithashtu tenori i jashtëzakonshëm Saimir Pirgu, sopranoja virtuoze Nino Machaidze, shoqëruar nga Orkestra Simfonike e TKOB-së, nën dirigjimin e maestros Jacopo Sipari di Pescasseroli.
Fllokos në skenë iu bashkuan kolege si emrat e njohur të teatrit dhe kinemasë, aktorja Luiza Xhuvani dhe Ema Andrea, si edhe ish-studentë të tij, aktorët Nik Xhelilaj dhe Kristian Koroveshi.
Emra të njohur të muzikës, si Pirro Çako, Ledina Çelo, Arilena Ara, Marsela Çibukaj, Soni Malaj, i dhanë atmosferë mbrëmjes përmes këngëve.
