Komitetei Teknik i Ekspertëve, pritet të mblidhet sot për të vendosur për masat e reja për parandalimin e përhapjes së Covid-19.
Masat kufizuese dy javore që u lajmëruan në datë 10 shkurt dhe hynë në fuqi me datë 11, skadojnë sot, ndaj pritet që Komiteti të mblidhet dhe t’i propozojë Qeverisë shtrengimin e masave.
Ky shtrengim është kërkuar dhe nga shumë qytetarë për shkak të rritjes së frikshme të rasteve pozitive ditore dhe vdekjeve. Prej afro një muaj numri i rasteve pozitive ditore është bërë 4-shifror, ndërsa mesatarja e jetëve të humbura është 15 në ditë.
Paraprakisht, nga burime jozyrtare është thënë se sot Komiteti do të vendosë për kufizimin e lëvizjes nga ora 18.00 e mbrëmjes deri në 06.00 të mëngjesit. Gjithashtu, pritet që të ketë dhe një lajmërim për mbylljen totale të fundjavave, për 14 ditë.
Vetëm dje sipas shifrave zyrtare nga Ministria e Shëndetësisë, janë kryer 3897 testime dhe kanë rezultuar pozitivë 1021 qytetarë. Me gjithë përpjekjet e stafit mjekësor, 19 qytetarë e kanë humbur betejën me virusin.
