Askush nuk mori pjesë me detyrim në takimin e Salianjit

Ish-deputeti i Partisë Demokratike, Qani Xhafa, reagoi sot në rrjetet sociale lidhur me pjesëmarrjen e tij në takimin e Foltores së Ervin Salianjit, të zhvilluar dje në sallën e Teatrit “Skampa” në Elbasan.

Xhafa hodhi poshtë pretendimet e kryetarit të PD-së, Sali Berisha, sipas të cilit aktiviteti ishte “sponsorizuar nga krimi” dhe pjesëmarrësit, përfshirë anëtarët e Degës Elbasan, ishin detyruar të merrnin pjesë nga eksponentë të botës kriminale, përfshirë Suel Çelën. Ish-deputeti e cilësoi këtë si një shpifje dhe mohoi kategorikisht çdo formë kërcënimi për të marrë pjesë.

Ai shtoi se, përkundrazi, shumë demokratë shprehën pakënaqësi që nuk ishin njoftuar për zhvillimin e aktivitetit dhe kërkuan llogari pse nuk ishin ftuar.

Në një postim të gjatë për opinionin publik, Xhafa tha se pjesëmarrja e tij ishte një vendim i lirë, motivuar nga dëshira për të ndihmuar PD-në pas zgjedhjeve të 11 Majit 2025, kur sipas tij partia ra në një “gjumë letargjik” që e dëmtonte më tej. Ai e cilësoi takimin si të frytshëm, duke përfshirë edhe shumë demokratë të rinj në forume drejtuese, të cilët përfaqësojnë të ardhmen e partisë.

“Unë nuk jam detyruar nga askush të marr pjesë, dhe mund të pyesni çdo pjesëmarrës – askush nuk ishte i detyruar të marrë pjesë apo të brohorasë,” theksoi Xhafa.

Ai i bëri thirrje Berishës që të sjellë prova konkrete nëse vërtetohet se Suel Çela ka qenë organizator i takimit, ndërsa nënvizoi se në të kundërt, duhet lejuar që të rinjtë të ecin përpara në betejën politike kundër qeverisë së Edi Ramës.

Gjatë takimit u diskutua gjithashtu për përgatitjen e protestës së 22 Dhjetorit, me qëllim që ajo të zhvillohet sa më masivisht dhe me ndikim në rrëzimin e qeverisë aktuale.

“Ju lutem të dëgjojmë zërin e secilit për të mirën e PD-së dhe të Shqipërisë,” përfundoi deklaratën e tij Qani Xhafa.

Reagimi:

Sqarim për opinionin publik në lidhje me takimin e z.Ervin Salianji në Elbasan datë 16 Dhjetor ora 18 00!

Të nderuar demokratë, anëtarë, simpatizantë të PD dhe mbarë opinionit publik, ju bëj me dije se dje pjesë e takimit me demokratët e Qarkut të Elbasanit isha dhe unë si një demokrat që nga viti 2005 ku kemi ndarë me ta të mirat dhe të këqijat e kësaj force politike!

Unë nuk jam detyruar nga askush që të marr pjesë në këtë takim por e pashë të arsyeshme se PD prej disa muajsh pas zgjedhjeve të 11 Majit 2025 ra në një gjumë letargjik që po e dëmtonte akoma më shumë!

Po kështu më gjeni një person anëtar partie, simpatizant apo çfardo, që ishte apo jo në takim, të prononcohet që ka qenë i detyruar nga dikush të marr pjesë, madje të brohorasë!

Ju bëj me dije se më janë zemëruar shumë demokratë që pse sna njoftove por koha ishte shumë e shkurtër vetëm dy ditë dhe e lamë në rrjedhë të lirë pjesmarrjen dhe për mendimin tim ishte takim shumë i mirë pasi kishte dhe shumë demokratë të rinj në forume drejtuese që janë e ardhmja e PD!

Për vetë profesionin që kam si Ing. mekanik i them Dr.Berishës nëse më bind me fakte që ai takim është bërë nga Suel Çela jam unë i pari që tërhiqem nëse është e kundërta duhet që të rinjtë të ecin përpara për të mundur regjimin e Edi Ramës!

Në atë takim u fol ndër të tjera edhe për protestën e 22 Dhjetorit që të jetë sa më e fuqishme për rrëzimin e kësaj qeverie!

Ju lutem të dëgjojmë zërin e çdokujt për të mirën e PDSH dhe për të mirën e Shqipërisë!

Me shumë respekt dhe mirënjohje Qani Xhafa!