Merret vendimi ‘drastik’, Berisha u jep urdhrin e prerë deputetëve

Partia Demokratike ka vendosur që zyrtarët e saj nuk do të marrin më pjesë në debate televizive nëse përballë tyre nuk janë përfaqësues të Partisë Socialiste.

Vendimi u komunikua nga ish-kryeministri Sali Berisha gjatë mbledhjes së sotme të grupit parlamentar. Ai akuzoi mazhorancën dhe kryeministrin Edi Rama se po përpiqen të zhvendosin vëmendjen publike nga problemet reale të qytetarëve, duke e fokusuar diskursin mediatik tek opozita.

Sipas Berishës, nga ky moment asnjë përfaqësues i PD-së nuk do të përballet më në studio me analistë “të lidhur me pushtetin”, duke e konsideruar këtë praktikë si një formë e re censure.

“Opozita nuk mund të bëhet pjesë e skenarëve të mazhorancës për të shmangur përgjegjësitë e qeverisë. Nuk do të jemi më pjesë e emisioneve ku përballë nuk ka përfaqësues të PS-së,” tha Berisha.

Vendimi i PD-së pritet të ndikojë ndjeshëm në formatin e debateve politike në media, veçanërisht në një moment kur vendi përballet me tension të lartë politik.