Merrte para për të bërë eko, arrestohet mjeku imazherist (EMRI)

Pas një hetimi 4-mujor të zhvilluar në bashkëpunim mes Policisë dhe Prokurorisë së Fierit, është finalizuar operacioni policor i koduar “Imazheria”, që çoi në pranga një mjek të spitalit rajonal.

Në pranga ka rënë Gëzim Taullaj, 66 vjeç, me detyrë mjek imazherist në spitalin e Fierit, i cili u kap në flagrancë në momentin që po merrte një shumë parash nga një pacient për të kryer një eko abdominale.

Hetimet kishin nisur pas informacioneve operative se mjeku u kërkonte pacientëve pagesa të paligjshme për ekzaminimet mjekësore. Nga verifikimet e kryera u konstatua gjithashtu se ai shpërdoronte detyrën duke ofruar shërbime edhe në dy klinika private gjatë orarit zyrtar të punës në spitalin publik.

Gjatë kontrollit të banesës së 66-vjeçarit, policia gjeti dhe sekuestroi si prova materiale:

• shumën që mjeku kishte marrë nga pacienti,

• 1.857.000 lekë të reja,

• 39.155 euro,

• 2.370 paund dhe

• 75 dollarë amerikanë.

Prokuroria pranë Gjykatës së Shkallës së Parë të Juridiksionit të Përgjithshëm Fier ka regjistruar procedimin penal për veprat “Shpërdorimi i detyrës” dhe “Korrupsioni pasiv i personave që ushtrojnë funksione publike”.

Materialet iu referuan Prokurorisë për veprime të mëtejshme procedurale.