MIRDITË/ Tërhiqet nga gara tjetër kandidat i Alibeajt. Mark Ruçi njoftoi me shkrim KQZ-në.

Kandidati për bashkinë e Mirditës i PD-së së vulës, Mark Ruçi, është tërhequr nga gara për zgjedhjet vendore të 14 majit.

Lajmi është konfirmuar nga vetë Ruçi, i cili deklaron se është tërhequr për arsye personale dhe familjare.

Ai i ka dërguar një letër Komisionit Qendror të Zgjedhjeve, ku i kërkon dorëheqjen si kandidat për kryetar bashkie i Mirditës.

“Për dijeni: KQZ Tiranë

Unë i quajtur Mark Gjon Ruçi i datëlindjes 20.08.1961 në Tarazh Mirditë, banues në Rubik-Mirditë paraqes kërkesën si më poshtë:

1) Duke qenë kandidat për Kryetarë Bashkie në Mirditë i propozuar nga subjekti Partia Demokratike e Shqipërisë, për arsyet përsonale dhe familjare deklaroj me vullnet të lirë dhe të plotë se tërhiqen nga gara e zgjedhjeve të 14 Majit 2023.

2) Lutem konfirmoni në KQZ dorëheqjen time për tu përjashtuar nga lista e kandidatëve për Kryetarë Bashkie në Mirditë”, thuhet në letër.

Kujtojmë se Ruçi nuk është i vetmi kandidat i PD-së së vulës që është tërhequr nga gara. Më parë, kanë dhënë dorëheqjen të tjerë kandidatë për kryetarë bashkish, si dhe për këshilla bashkiakë.