Buzi: “Eja merre vajzën këtu, po ta besoj ty…”

Korroveshaj: “Gjërat do të rregullohen, lëre armën dhe eja me mua”

Teksa në rrjet janë publikuar pamjet e momentit dramatik kur 35-vjeçari Refit Buzi liroi ish-partneren e tij, Rozalinda Plaka, të cilën e mbajti peng për rreth 4 orë brenda automjetit të tij.

Ngjarja u zhvillua gjatë negociatave intensive të drejtuara nga Mariglen Korroveshaj, Shefi i Stacionit të Policisë Roskovec, i cili komunikoi vazhdimisht me autorin përmes altoparlantit, duke u përpjekur ta bindte të dorëzohej dhe të mos i bënte dëm të resë.

Sipas pamjeve të siguruara nga News24 dhe informacionit të zbardhur nga gazetarja Xhensila Kodra, negociatat mes palëve kanë qenë të tensionuara dhe vendimtare për shpëtimin e 24-vjeçares.

PJESË E ZBARDHUR NGA NEGOCIATAT

MARIGLEN KORROVESHAJ: Vajzës mos i bëj keq!

BUZI: Nuk e liroj, mos u afro

KORROVESHAJ vijon negociatat: Do të zgjidhim gjithçka bashkë, ejani me mua!

BUZI: Eja merre vajzën këtu, po ta besoj ty…

Në këtë moment kritik, Korroveshaj afrohet pranë automjetit, merr të renë në krahë dhe largohet disa metra larg autorit, duke e vendosur në siguri. Më pas ai rikthehet sërish për të vijuar përpjekjet për ta bindur Buzin të dorëzohej.

KORROVESHAJ: Gjërat do të rregullohen, lëre armën dhe eja me mua

BUZI: Largohu me vajzën, ik, unë do të rri këtu! Mos u afro ose do të vras veten!

Pas këmbënguljes së autorit, efektivi largohet bashkë me Rozalinda Plakën, e cila u transportua me urgjencë drejt Spitalit të Fierit në gjendje të rënduar psikologjike.

Pavarësisht negociatave disaorëshe dhe përpjekjeve të vazhdueshme të policisë për ta bindur të dorëzohej, 35-vjeçari nuk pranoi dhe i dha fund jetës së tij rreth orës 16:35 të së premtes.

Ngjarja ka tronditur opinionin publik, ndërsa momenti i shpëtimit të të resë konsiderohet si një ndër episodet më kritike dhe të suksesshme të ndërhyrjes policore në këtë rast.