Ndalohet shoferi i morgut, filmoi trupin e pajetë të 31-vjeçarit që u vra në Dhërmi

Policia ka ndaluar shoferin e morgut që paraditen e djeshme transportoi trupin e pajetë të 31-vjeçarit me iniciale E.N, i cili u gjet në zonën e Gjipesë pranë një guroreje.

31-vjeçaru u vra nga pronari i një hoteli në Dhërmi, me iniciale G.Sh.

Policia njofton se shoferi 62-vjeçari, kishte filmuar me aparat celular trupin e pajetë për t’ua dërguar burimeve mediatike me qëllim publikimin.

“Bazuar në këtë informacion, shtetasit A. I., 62 vjeç, me detyrë shofer i ambulancës së morgut, i është bërë këqyrja e aparatit celular nga grupi hetimor, ku i janë gjetur pamjet filmike të trupit të E.N, të cilat ua kishte dërguar burimeve mediatike me qëllim publikimin.  Në vijim të veprimeve, u bë ndalimi i shtetasit A. I., 62 vjeç, me detyrë shofer i ambulancës së morgut Vlorë, për veprën penale “Zbulimi i akteve dhe të dhënave sekrete”. Videoja megjithëse ishte në duart e gazetarëve nuk u publikua prandaj Drejtoria Vendore e Policisë Vlorë i falënderon”, thuhet në njoftim.