Ndërron jetë sportisti shqiptar 24 vjeç

Komiteti Olimpik Kombëtar Shqiptar (KOKSH) ka njoftuar sot se sportisti Klavio Meça ka ndërruar jetë.

Nga të dhënat paraprake thuhet se 24-vjeçari nga Fushë-Kruja, Klavio Meça ndërroi jetë nga një atak kardiak, por rrethanat janë ende të paqarta.


Ai ishte një notar profesionit, rekordmen dhe konsiderohej si e ardhmja e sportit për vendin tonë. Meça mbante rekordin kombëtar në 400 m stil i lirë (4’04”03), të vendosur në Kampionatin Botëror të mbajtur në Budapest të Hungarisë.

Njoftimi i plotë:
Një lajm i pabesueshëm na erdhi si bombë për ndarjen nga jeta të sportistit shqiptar Klavio Meca në moshën 24 vjec. Nuk gjejmë fjalë për të shprehur dhimbjen e madhe… Kujtojmë që notari Klavio Meca, ka pasur një sërë arritjesh sportive ndërsa vecojmë se në Budapest të Hungarisë ka vendosur një rekord të ri kombëtar në 400 m stil i lirë me kohën e përgjithshme 4’04”03. Ishte një djalë i shkëlqyer me sjellje shembullore dhe disiplinë sportive. KOKSH i shpreh ngushëllime familjes dhe komunitetit sportiv. U prehsh në paqe kampion! Do të na mungosh…