Ndezi cigaren pranë karburantit, makina shpërthen në flakë

Një makinë është përfshirë nga flakët pranë një karburanti, si pasojë e ndezjes së një cigareje. Ngjarja është regjistruar mbrëmjen e sotme në qytetin e Korçës.

Sipas policisë, ndërsa makina kishte ndaluar pranë një karburanti për të marrë një porosi, drejtuesja e mjetit ka ndezur një cigare.

Për fatin e saj të keq, ka pasur rrjedhje gazi nga impianti i vendosur në makinë.

Si pasojë e kësaj ngjarjeje kanë mbetur të lënduar katër persona, punonjësi i karburantit me iniciale D.M, drejtuesja e mjetit V.D, si dhe dy pasagjerët që ndodheshin në mjet me iniciale J.O dhe F.D.

Ata u dërguan për ndihmë mjekësore në Spitalin e Korçës, ku ndodhen jashtë rrezikut për jetën. Grup hetimor po punon ndërkohë për të zbardhur rrethanat e ngjarjes.

Njoftimi i plotë

Më datë 27.12.2018, jemi njoftuar se në lagjen nr 9, ka rënë zjarr në mjetin tip “Benz” me targa AA575PT, në pronësi të shtetases V.D, i cili ka qenë i ndaluar pranë një karburanti.

Për pasojë kanë marrë dëmtime shtetasi D.M, (punonjës i karburantit) drejtuesja e mjetit V.D, shtetasja J.O dhe shtetasi F.D, që ndodheshin brenda në mjet, të cilët u dërguan për ndihmë mjekësore në Spitalin e Korçës, ku ndodhen jashtë rrezikut për jetën.

Paraprakisht dyshohet se në mjet ka pasur rrjedhje gazi dhe zjarri mund të ketë rënë aksidentalisht, nga ndezja e një cigareje nga drejtuesja e mjetit.

Grupi hetimor po punon për të sqaruar rrethanat e ngjarjes dhe përcaktuar shkaqet e rënies të zjarrit.