Një 41-vjeçar në Durrës është ndalur rastësisht nga efektivët e policisë teksa shëtiste pa lejen për dalje.
Mirëpo, 41-vjeçari Verjon Menaj, tentoi t’i shpëtonte policisë duke ikur me vrap. Efektivët nuk kanë hequr dorë, e kanë ndjekur dhe i vunë prangat. Por më pas zbuluan se 41 vjeçari jo thjesht kishte thyer karantinën.
Ai ishte një person i shpallur në kërkim, i dënuar me 15 vite burg për trafikim të miturish dhe falsifikim pasaporte kryer në bashkëpunim.
NJOFTIMI I POLICISË:
Punonjësit e Patrullës së Përgjithshme të Stacionit të Policisë Plazh, duke kontrolluar personat për autorizimin përkatës të lëvizjes, kanë ndaluar shtetasin Verjon Menaj, 41 vjeç, në lagjen nr. 13, Plazh dhe i kanë kërkuar autorizimin e lëvizjes dhe dokumentin e identifikimit, por ai nuk ka pranuar te japë dokument identifikimi dhe është larguar me vrap. Patrulla është vënë në ndjekje të tij dhe ka bërë të mundur kapjen dhe shoqërimit e 41-vjeçarit në ambientet e Policisë.
Gjatë verifikimit të gjeneraliteteve ka rezultuar se shtetasi Verjon Menaj ishte person në kërkim, pasi Gjykata e Shkallës së Parë për Krimet e Rënda e ka dënuar me 15 vite, 10 muaj e 27 ditë burgim, për veprat penale “Trafikim i të miturve” dhe “Falsifikimi i pasaportës”, kryer në bashkëpunim.
Po gjatë patrullimeve dhe verifikimeve të personave që shkelin orarin e karantinës, Patrulla e Përgjithshme e Stacionit të Policisë Plazh ka kapur një tjetër person të shpallur në kërkim, konkretisht shtetasin I. P., 31 vjeç, për veprën penale “Plagosja e lehtë me dashje”. Ky shtetas, më datë 10.04.2020, rreth orës 09:00 në lagjen nr. 13, Durrës, ka goditur me sende të forta shtetasin A. B., 47 vjeç, banues në Durrës.
