Nesër nis devocioni i 13 të martave të bekuara të Shna Ndout

Më 17 mars nis udhëtimi shpirtëror i njohur si “Trembëdhjetë të martat e Shna Ndout”, një traditë e përhapur ndër besimtarët katolikë që i përgatit ata për festën e Shën Antoni i Padovës më 13 qershor.

Ky devocion antonian zgjat 13 javë rresht, gjatë të cilave besimtarët mblidhen për lutje dhe meshë, duke nderuar figurën e shenjtit françeskan, i njohur si predikatar i shquar dhe pajtor i të varfërve dhe i atyre që vuajnë.

Tradita dëshmohet çdo vit nga prania e madhe e pelegrinëve në shenjtëroret dhe kishat kushtuar shenjtit. Edhe në trevat shqiptare kjo përshpirtëri është shumë e përhapur, veçanërisht në Kishë e Shna Ndout dhe në Gjakovë, ku besimtarë të shumtë ngjiten për t’u lutur dhe për të kërkuar ndërmjetësimin e shenjtit për shëndet, paqe dhe ndihmë në vështirësitë e jetës.

Ky pelegrinazh praktikohet në shenjë pendese, sakrifice dhe falënderimi. Pelegrinazhi fillon në mes të muajit mars, me të martën e parë në shenjtëroren e Shna Ndout, dhe përfundon më 13 qershor, ditën e festës së shenjtit.

Për 13 të marta radhazi, besimtarë nga zona të ndryshme dhe madje nga fe të ndryshme ndezin qirinj në guvat e shkëmbinjve dhe luten me besimin në ndërmjetësimin dhe mrekullitë e shenjtit.

Kremtimi i “13 të martave të Shna Ndout” lidhet me kujtimin e ditës së varrimit të Shën Antoni i Padovës, që u zhvillua të martën pas vdekjes së tij më 17 qershor 1231 në Padova. Sipas traditës, gjatë përcjelljes së trupit të tij nëpër rrugët e qytetit ndodhën shumë mrekulli për ata që iu lutën ndërmjetësimit të tij.

Për besimtarët, figura e Shën Antonit mbetet një udhërrëfyes shpirtëror që i fton të afrohen më shumë me Krishtin dhe të jetojnë me besim, shpresë dhe dashuri ndaj të tjerëve.