“Paratë e tij kanë erë gjaku, droge dhe spekulimi”

Deputeti i Partisë Socialiste, Erion Braçe, ka publikuar një reagim të ashpër në rrjetet sociale, ku hedh akuza të rënda ndaj një personi që e cilëson si “oligark” dhe pretendon se ky i fundit po përdor profile të rreme për ta sulmuar në internet.

Edhe pse nuk e përmend drejtpërdrejt me emër, reagimi i tij është publikuar me referencë ndaj Agron Shehajt. Braçe pretendon se prej dy ditësh po përballet me komente nga profile që, sipas tij, nuk kanë identitet të qartë dhe përdoren për sulme të organizuara.

“Patronazhistët e oligarkut në sulm! E prisja, ka dy ditë që e bën; jo vetëm ndaj meje, por ndaj cilitdo të gjalli që komenton këtu”, shkruan Braçe, duke i përshkruar profilet si llogari pa emra, pa postime dhe me pak ndjekës.

“Paratë e tij kanë tri cikle”

Në pjesën më të rëndë të reagimit, deputeti socialist ngre akuza ndaj burimeve të pasurisë së personit që ka në shënjestër, duke i ndarë ato në tri kategori: shfrytëzimi i punonjësve, paratë që ai i lidh me drogën dhe spekulimet financiare.

Sipas Braçes, cikli i parë i pasurisë lidhet me atë që ai e përshkruan si shfrytëzim të punonjësve në sektorin e infrastrukturës. Ai pretendon se përfitimet e biznesit janë krijuar në kurriz të njerëzve që, sipas tij, nuk janë shpërblyer në mënyrë të drejtë për punën e tyre.

“Cikli i parë i parave të tij vjen era gjak. Janë mundi e sakrifica e djemve e vajzave të shfrytëzuar barbarisht këtu, në infrastrukturat e tij”, shkruan Braçe, duke shtuar se paratë e fituara transferohen jashtë vendit.

Akuza të tjera lidhen me drogën. Braçe pretendon se në ciklin e dytë të pasurisë përfshihen para që i lidh me aktivitetin e narkotikëve dhe përmend persona që, sipas tij, kanë vepruar në Gjermani. Ai pretendon gjithashtu se disa prej tyre kanë pasur angazhime politike në Shqipëri.

Në vijim, deputeti flet për një cikël të tretë, të cilin e lidh me atë që e quan spekulim financiar, përfshirë shitblerje fiktive dhe rritje artificiale të vlerave të pasurive.

Braçe: Dokumentet ua kam dorëzuar institucioneve

Në fund të reagimit, Braçe pretendon se dokumente lidhur me këto çështje ua ka dorëzuar më herët agjencive shtetërore, por shpreh pakënaqësi për mungesën e veprimeve që, sipas tij, duhet të ishin ndërmarrë.

“Ja kam dorëzuar herët unë letrat e tyre agjencive të kësaj qeverie; ja bëjnë ‘muuu’; nuk e kam kuptuar kurrë pse e kanë falur. Si thoni? Pse e kanë falur?”, përfundon ai.

Deri në këtë reagim, akuzat e ngritura nga Braçe duhen konsideruar si pretendime të tij dhe nuk përbëjnë, në vetvete, prova për shkelje ligjore. Për verifikimin e tyre nevojiten dokumente dhe konstatime nga institucionet kompetente. Në reagimin e publikuar nuk paraqiten prova konkrete që të vërtetojnë akuzat, ndërsa në materialin burimor nuk përfshihet një përgjigje nga Agron Shehaj.

Reagimi i plotë:

#FJALAIME

PATRONAZISTET E OLIGARKUT NE SULM!

E prisja, ka dy dite qe e ben;
Jo vetem ndaj meje por ndaj cilitdo te gjalli qe komenton ketu.

Shihini;
Jane pa fytyre, pa emra, pa postime, me fare pak ndjekes apo te ndjekur prej tyre. NUK EGZISTOJNE!

Jane robotet e kellires me te madhe qe ka politika sot;
ESHTE OLIGARKU I VETEM NE POLITIKE QE PAGUAN PATRONAZISTE NE TERRITOR E PATRONAZISTE NE RRJET!
Nese ate ne territor i ka bandite te dhunshem, keta ne rrjet i ka eunuke te dukshem;

Jam marre une me keta. Edhe me kete oligarkun jam marre.
Parate qe e bene te tille, OLIGARK, jane ne tre cikle;
Cikli i pare i parave te tij vjen era gjak. Jane mundi e sakrifica e djemve e vajzave te shfrytezuar barbarisht ketu, ne infrastrukturat e tij. Ka fituar pafund ai prej tyre, por te shfrytezuarit nuk marrin as sac marrin mesuesit sot si rroge; ai nuk i paguan asgje ketij vendi, transferon jashte parate e gjakut te te shfrytezuave ketu.

Cikli i dyte i parave te tij, vjen era miell, eshte ai mielli i ndyre qe masakron e vret djem e vajza edhe ketu; jane kusherinj te tij ata qe kane bere drogen ne Gjermani e qe ketu ishin punonjes politik te tij.

Cikli i trete i parave te tij, kane eren e spekullimit, shitje blerje fiktive, fryrje fiktivisht te vlerave, pasuri qe zmadhohet prej tyre.

Ja kam dorezuar heret une letrat e tyre agjencive te kesaj qeverie; ja bejne muuu; nuk e kam kuptuar kurre pse e kane falur. Si thoni? Pse e kane falur?