Në vitin 2021, Sokol Parllaku, një person i konsideruar i afërt me ish-nëndrejtorin e AKSHI-t Daniel Shima, themelon kompaninë “Premium Glass”. Ai nuk ishte i panjohur në sektor, pasi që prej vitit 2015 zotëronte edhe një tjetër subjekt, “Alu Glass”, i fokusuar në tregtinë e xhamave, prodhimin e dyerve dhe dritareve prej alumini si dhe shërbime të ngjashme ndërtimi.
Në pamje të parë, aktiviteti i dy kompanive duket normal për një sipërmarrje të këtij lloji. Megjithatë, zhvillimet në strukturën e pronësisë tërheqin vëmendjen. Në kompaninë “Premium Glass”, nëna e Daniel Shimës, Merita Shima, hyn si aksionere kryesore duke marrë 60% të kuotave. Me këtë përqindje, ajo nuk është thjesht investitore, por zotëruese e kontrollit vendimmarrës në kompani.
Pak më vonë, Merita Shima blen edhe 40% të mbetura të aksioneve nga themeluesi për vetëm 40 mijë lekë të reja, duke u bërë pronare e vetme. Në letër, vlera mund të dukej e përshtatshme për një kompani të re me kapital minimal. Por paralelisht, “Premium Glass” dhe “Alu Glass” kishin nisur një seri blerjesh të konsiderueshme tokash dhe pronash, të shoqëruara me projekte zhvillimi ndërtimi. Kjo krijon kontrast të fortë mes çmimit simbolik të blerjes së aksioneve dhe vlerës reale të aseteve që kompania po siguronte.
Investimet në pasuri të paluajtshme kishin nisur edhe më herët. Në vitin 2020, përmes “Alu Glass” u blenë dy apartamente në një zonë të preferuar rezidenciale pranë kompleksit Delijorgji në Tiranë. Secili prej tyre kishte sipërfaqe rreth 160 metra katrorë dhe u përdorën si ambiente zyrash.
Në mars 2021, “Premium Glass”, tashmë në pronësi të Meritës Shima, blen rreth 3 mijë metra katrorë tokë në zonën e Kasharit për 2.1 milionë lekë. Në të njëjtën zonë, përmes “Alu Glass” sigurohen edhe 7100 metra të tjera, duke e çuar sipërfaqen totale në rreth 10 mijë metra katrorë. Në qershor të po atij viti, blihet një tjetër parcelë prej 3600 metrash në Dobresh.
Ndërkohë, edhe kompania tjetër e lidhur me partnerin Parllaku vazhdon zgjerimin. Në shkurt 2021, “Alu Glass” blen 2200 metra tokë në zonën e Prushit në periferi të Tiranës. Gjatë prillit dhe majit të atij viti sigurohen edhe dy parcela në Durrës, në zonën e njohur si Rruga e Koxhasë, ku më pas përfitohet edhe leje ndërtimi. Në vitin 2022, subjekti blen tre parcela të tjera në Kashar me sipërfaqe të konsiderueshme dhe me vlerë totale që arrin rreth 700 mijë euro.
Me rritjen e investimeve në toka, kompanitë e lidhura me rrethin e ish-zyrtarit të AKSHI-t kalojnë gradualisht në sektorin e ndërtimit. Në mars 2022, “Alu Glass” dhe “Premium Glass” marrin leje për ndërtimin e një godine me 8 kate mbi tokë dhe një kat nëntokë në Tiranë.
Në të njëjtën periudhë, “Premium Glass” nënshkruan një kontratë me një kompani ndërtimi për rezervimin e 9 apartamenteve dhe 14 vendeve parkimi, me vlerë totale rreth 869 mijë euro. Bashkëpunimi, sipas palës ndërtuese, lidhej me punime të kryera nga shoqëritë e lidhura me Parllakun në projekte të mëparshme ndërtimi.
Zgjerimi vijon edhe në vitet pasuese. Në korrik 2024, në një truall në njësinë 14 në Tiranë, sigurohet leje për një godinë 16-katëshe mbi tokë dhe tre kate nëntokë. Trualli rezulton në pronësi të “Alu Glass”, ndërsa zhvillimi i projektit përfshin kompani të tjera të lidhura me të njëjtin rreth biznesi.
Në prill 2024 blihet një tjetër truall në rrugën “Him Kolli” në Tiranë për rreth 770 mijë euro. Ndërsa nga viti 2022 deri në fillim të vitit 2025, në zonën e Durrësit kryhen blerje të shumta parcelash që arrijnë një sipërfaqe totale rreth 24.500 metra katrorë. Çmimet e deklaruara të blerjes variojnë nga simbolike deri në vlera që nuk përputhen me tregun, duke ngritur pikëpyetje mbi mënyrën e financimit.
Në fund të vitit 2022, pas një periudhe investimesh intensive dhe kontratash me vlera të mëdha, Merita Shima vendos të shesë aksionet e “Premium Glass” tek ortaku Sokol Parllaku për rreth 100 mijë lekë të reja. Kjo ndodh në një kohë kur hetimet për tenderat e AKSHI-t kishin nisur të thelloheshin.
Megjithëse pronësia formale ndryshon, administrimi i kompanive vijon të lidhet me të njëjtët persona. Administratori i emëruar në një prej subjekteve shfaqet më pas edhe në kompani të tjera të krijuara në vijim, përfshirë një shoqëri të re të themeluar në vitin 2024 ku përfshihet vetë Daniel Shima.
Ndryshimet e shpeshta në strukturat e pronësisë dhe administrimit krijojnë një skemë të ndërlikuar ku emrat ndërrohen, por lidhjet mbeten. Lëvizjet e fundit në administrim ndodhin në fund të vitit 2025, në të njëjtën periudhë kur dosja hetimore për tenderat e AKSHI-t po finalizohej me masa sigurie ndaj disa personave të përfshirë.
Pikëpyetja kryesore që mbetet është burimi i financimit për investime që arrijnë vlera shumë milionëshe në prona dhe ndërtim. Juristë dhe ekspertë të ekonomisë theksojnë se transaksionet e tilla, nëse kryhen gjatë periudhave hetimore apo me çmime të pazakonta, mund të interpretohen si përpjekje për të fshehur ose maskuar origjinën e fondeve.
