Nis gjykimi për Dritan Rexhepin dhe bandën e tij

Rexhepi urdhëroi ekzekutimin e Jan Prengës

Pas një viti, Gjykata e Posaçme vendosi të kalojë ditën e sotme për gjykim çështjen penale ndaj Dritan Rexhepit dhe grupit të tij të strukturuar kriminal, që akuzohen për rrëmbimin, vrasjen dhe zhdukjen e trupit të Jan Prengës.

Në momentin kur nisi hetimi, Rexhepi ishte i burgosur në Ekuador, ndërkohë që tashmë nuk dihet saktësisht vendndodhja e tij, teksa dyshohet se ka thyer rregullin për të mos dalë nga vendi i Amerikës Latine.

Gjykimi ka nisur edhe për Gentian Funiqin, që ndodhet pas hekurave në Spanjë, si dhe për pjesëtarët e tjerë të këtij grupi: Geraldo Martini, Aldo Majnishta, Martin Bleta, Korado Geshtenja dhe Artan Docaj. Ndërkohë, gjyqi për Altin Hajrin për të njëjtat akuza është pezulluar deri në kapjen e tij.

Por kush është Dritan Rexhepi? Rexhepi është regjistruar me emrat Ioannis Dionysopoulos (emër grek) dhe me Lulzim Murataj (emër shqiptar) e Gramoz Rexhepi (emër shqiptar).

Për të ka tre ‘alarme të kuqe’ nga Interpol, pasi ai ka tre arratisje të regjistruara: në vitin 2006 nga Policia e Durrësit, në Shqipëri, në 2011 nga burgu i Vogheras në Itali dhe nga burgu Merksplas Belgjikë, në të njëjtin vit.