Nisin hetimet për punime të paligjshme në Zvërnec

Tre muaj pas ndërhyrjes së makinerive të rënda në zonën e mbrojtur Pishë Poro–Nartë, Prokuroria e Vlorës ka nisur zyrtarisht hetimet, duke regjistruar një procedim penal për disa vepra të rënda që lidhen me dëmtimin e mjedisit dhe ndërtimet e paligjshme.

Sipas një përgjigjeje zyrtare, organi i akuzës ka hapur procedimin penal nr. 772 për vitin 2026, ku përfshihen katër akuza kryesore: ndërtim i paligjshëm, dëmtim i habitateve në zonat e mbrojtura, prerje e paligjshme e pyjeve dhe shpërdorim detyre. Megjithatë, pavarësisht zhvillimeve, deri në këtë fazë nuk ka ende persona të identifikuar apo të regjistruar si nën hetim.

Ky zhvillim vjen në një kohë kur projekti në fjalë ka qenë në qendër të debatit publik dhe politik, për shkak të dyshimeve për shkelje ligjore dhe ndikim të rëndë në ekosistem. Paralelisht me këtë procedim, më herët është ndërmarrë edhe një hetim tjetër nga strukturat e posaçme, ku Gjykata e Posaçme ka vendosur sekuestro mbi transaksione me vlerë 128 milionë euro që lidhen me shitblerjen e tokave në zonë. Hetimet përfshijnë dyshime për pastrim parash dhe falsifikim dokumentesh, ndërsa për këtë çështje është shpallur në kërkim edhe Artur Shehu, bashkë me një grup personash të tjerë të përfshirë në të ashtuquajturën “Korporata Aruba”.

Ndërhyrjet në terren u denoncuan fillimisht nga aktivistët mjedisorë në fund të muajit prill, duke nxitur reagime të forta publike dhe duke shërbyer si pikënisje për një nga lëvizjet më të mëdha protestuese në vend në dekadat e fundit. Protestat, të njohura si “Revolucioni i Flamingove”, kanë vijuar për javë të tëra, duke mbledhur mbështetje të gjerë si brenda vendit, ashtu edhe në diasporë.

Sipas të dhënave të publikuara, ndërhyrjet në zonën e mbrojtur kanë përfshirë hapjen e rrugëve të reja, rrethimin me tela me gjemba dhe ndërtime të tjera infrastrukturore, të cilat dyshohet se janë kryer pa përmbushur detyrimet ligjore dhe pa një studim të plotë mjedisor. Organizatat mjedisore kanë ngritur alarmin për dëme të pakthyeshme në habitatet natyrore, duke theksuar se ndërhyrja ka fragmentuar rëndë territorin dhe ka cenuar balancën ekologjike të zonës.

Nga ana tjetër, qeveria ka mbrojtur fillimisht projektin, duke argumentuar se bëhej fjalë për ndërhyrje në pronë private dhe punime përgatitore. Megjithatë, deklaratat zyrtare kanë ndryshuar në kohë, ndërsa debati mbi ligjshmërinë dhe ndikimin e projektit mbetet i hapur.

Projekti i njohur si “Zvërnec Peninsula”, i prezantuar publikisht në vitin 2024, parashikon zhvillimin e një resorti luksoz në zonë dhe lidhet me investitorë ndërkombëtarë përmes një strukture komplekse kompanish të regjistruara në vende të ndryshme. Ky projekt ka nxitur jo vetëm hetime penale, por edhe reagime të forta qytetare, duke e kthyer në një nga çështjet më të debatueshme të momentit në vend.