Nuk ndalen fadromat/ Bushati: Ja ‘dallëndyshet’ e Ramës në media

Për të katërtën ditë me radhë, fadromat e IKMT kanë vijuar edhe këtë të hënë të 5 shtatorit ndërhyrjen në ambientet e ‘Prestige Resort’.

Aksioni i IKMT vijon në prezencën e forcave të policisë.

Për më tepër shembjet në resort vijojnë edhe në ditë pushimi zyrtar, që sot përkon me Shenjtërimin e Nënë Terezës

IKMT ka shkatërruar dy pishina në resort, ndërkohë që turistë të shumtë vijojnë të qëndrojnë në hotel dhe janë shqetësuar nga zhurmat e matrapikut.

Kurse gazetari Andi Bushati, ka përcjellë një mesazh për gazetarët që flasin për këtë çështje.

“Po shoh një sërë gazetarësh, analistësh, portalesh që numërojnë sa herë e kanë dredhur mediet e Irfanit, për të treguar se kjo nuk është një betejë për frikësimin e medieve.

Në shumicën e fakteve që përzgjedhin ata kanë të drejtë, por manipulimi i tyre është se nuk përmendin fare qeverinë që vjedh dy herë publikun: një herë kur lëshon leje abuzive, për një media që i shkon për shtat dhe herën tjetër, kur shkallmon ato që ka lejuar vete, vetëm sepse mediat nuk i pëlqejnë.

Ata që bëjnë këtë loje të njëanshme s’janë asgjë më shumë se dallëndyshe të tjera në shërbim të Ramës,” shkruan Bushati.