‘O Gëzim si më zhgënjeve’, Rama nuk kursen as ‘padronin’ e Maliqit

Gjatë mbledhjes së sotme me kryebashkiakët për Paketën e Maleve, kryeministri Edi Rama nuk i kurseu batutat, këtë herë në adresë të kryebashkiakut të Maliqit, Gëzim Topçiu, një prej drejtuesve vendorë më jetëgjatë në vend.

Rama shfaqi pakënaqësinë e tij për faktin që bashkia nuk kishte dorëzuar ende hartat e zonave brenda afatit pesëmujorsh, duke i kujtuar Topçiut përvojën e gjatë në pushtetin lokal.

“O Gëzim, po ti si më zhgënjeve sot! Ti je legjenda e pushtetit vendor… sa mandate ke, shtatë apo tetë?”,  u shpreh Rama me ironi.

Në përgjigje, Topçiu tha se puna për hartat është në proces dhe se bashkia ka bërë aplikimet e nevojshme.

“Në fakt dhe ne kemi punuar, aplikimet janë bërë. Jemi duke përpiluar hartën. Nuk është për t’u justifikuar, por do ta bëjmë,”  u shpreh kryebashkiaku i Maliqit.

Kryeministri ka përsëritur edhe më herët thirrjen për dorëzimin në kohë të hartave për Paketën e Maleve, një projekt që synon nxitjen e zhvillimit rural dhe turizmit në zonat malore të vendit.