“OPGJ-të sekserë të prokurorëve”, Olsian Çela bën “sehir”

Pas shqetësimit të ngritur publikisht nga Prokurori i Përgjithshëm, Olsian Çela, lidhur me problematikat në hetimet e kryera nga oficerët e policisë gjyqësore (OPGJ), edhe ish-prokurorë dhe avokatë konfirmojnë se kjo situatë mbetet shqetësuese dhe e përhapur.

Sipas ekspertëve të drejtësisë, në një sërë rastesh janë evidentuar praktika të papranueshme, ku operatorë të policisë gjyqësore dyshohet se kanë luajtur rolin e ndërmjetësit mes prokurorëve dhe palëve të interesuara.

Avokati Alban Duraj thekson se problematika nuk kufizohet vetëm te mungesa e profesionalizmit, por përfshin edhe raste të dyshuara korrupsioni, të cilat cenojnë drejtpërdrejt integritetin e sistemit të drejtësisë.

“Kryerja e shkeljeve të tjera, si në shumë raste që ne kemi parë, pra kryerja e veprave penale, siç mund të jetë korrupsioni pasiv, ku në shumë çështje oficerët e policisë gjyqësore kanë dalë si sekserë të prokurorëve për mbylljen e çështjeve, edhe pse prokurorët në shumicën e rasteve nuk kanë marrë një dënim apo nuk janë dënuar, është ndërprerë hetimi te oficeri i policisë gjyqësore”, u shpreh Duraj.

Ai shton se cilësia e dobët e hetimeve lidhet ngushtë edhe me faktorë strukturorë, si mbingarkesa e madhe në punë dhe mungesa e burimeve të nevojshme për një funksionim eficient.

“Hetimet janë difektoze për shkak të një ngarkese shumë të madhe që kanë oficerët e policisë gjyqësore, të cilët kanë një numër të reduktuar të stafit të tyre. Gjithashtu, mungon infrastruktura, pasi kemi një infrastrukturë që lë shumë për të dëshiruar, si për sa i përket godinave ku ata ndodhen, ashtu edhe pajisjeve, teknologjisë, si kompjuterët apo mjetet e tjera ndihmëse”, deklaroi ai.

Edhe pse vetë Prokurori i Përgjithshëm ka pranuar publikisht se hetimet e kryera nga OPGJ-të përballen me probleme serioze, deri në këtë fazë nuk është bërë publik asnjë plan konkret masash apo ndërhyrje për të adresuar këto shqetësime në mënyrë të strukturuar.