“Ortaku i Olsi Ramës dhe këshilltari i Xhaçkës i përfshirë në skemë mashtrimi ndërkombëtar’

Zëdhënësja e Partisë Demokratike, Ina Zhupa, i bëri jehonë një raportimi nga një konsorcium gazetarësh investigativë, ku tregohet se Armant Josifi, ortak i vëllait të kryeministrit dhe këshilltar i ministres së Mbrojtjes, është i përfshirë në një skemë mashtrimi ndërkombëtar. Zhupa ngre edhe disa pyetje që duhen sqaruar.

POSTIMI

Armant Josifi, ortaku i Olsi Ramës dhe njëkohësisht këshilltari i Olta Xhaçkës, sipas investigimit të gazetarëve të 23 vendeve të botës, është i përfshirë në një skemë mashtrimi ndërkombëtar multimilionere!

Nuk është hera e parë që Shqipëria falë ortakërive, miqësive, kushërinjve, bashkëpunëtorëve të Ramës, të citohet në mediat botërore për krime, droge, mashtrime!

Mashtrimi multi-milionësh i kompanisë së callcenter-ave, në Tiranë administrohet nga Josifi, thotë investigimi i publikuar në mediat prestigjioze. Bëhet fjalë për kompaninë Milton Group me bazë në Kiev, kryeqyteti i Ukrainës, që merret me mashtrimin me kriptomonedhat. Qytetarë nga Evropa dhe shtete të tjera jo-evropiane kanë rënë pre e një skeme mashtruese duke humbur edhe deri në 40 mijë euro një person. Atyre u premtohej rritje e investimit të tyre, por kjo skemë mashtruese gjigante i ka siguruar Milton Group një fitim prej 70 milionë dollarësh.

Disa prej mediave ndërkombëtare, që kanë publikuar skandalin, si La Stampa dhe El Confidencial japin detaje interesante sa i përket operimit të Milton Group në Shqipëri. Ky callcenter në vendin tonë menaxhohet nga Armant Josifi, këshilltar në Ministrinë e Mbrojtjes, i cili përfshihet ne investigim edhe si ortaku i vëllait të kryeministrit shqiptar Edi Rama. Josifi ka qenë ortaku i Olsi Ramës në Pegasus Communication!

Shqiptarët kanë të drejtë të dinë:

-Si mund të vazhdojë të qëndrojë këshilltar në Ministrinë e Mbrojtjes kur akuzohet për mashtrim ndërkombëtar nga një investigim serioz?

-Kush është mbrojtja shtetërore qe ka Josifi?

-Sa ka ndikuar ortakëria me Olsi Ramën në Pegasus Communication për të pasur favore pushteti?

-A është Xhaçka e përfshirë apo në dijeni të kësaj skeme?

-A është Edi Rama i përfshirë apo në dijeni të kësaj skeme?

-Pse duhet të paguajnë taksapaguesit shqiptarë një njeri që akuzohet për mashtrim ndërkombëtar?

-Cilat janë përfitimet që ky pozicion në Ministrinë e Mbrojtjes i krijon për lehtësira me autoritetet shqiptare?

-A do hetojë prokuroria shqiptare në bazë të investigimit të publikuar?