PAGESAT E TË DREJTËS SË AUTORIT, MEDIAT BËHEN BASHKË SOT NË GJYKATËN E APELIT

Përfaqësuesit e mediave në proces, të ndodhur përpara mungesës së argumentave ligjore, vazhdojnë përpjekjet për zvarritjen e procesit, me argumenta bajate dhe aspak ligjore. Të ndodhur përpara forcës së të vërtetës dhe mbështetjes masive të autorëve shqiptarë në seancat e procesit gjyqësor, pushtetit i tyre mediatik hesht, por në të njëjtën kohë kërcënon. Insistimi i autorëve dhe artistëve, forca e opinionit publik është e vetmja mënyrë për t’u përballur me presionin e tyre të pandershëm.
Ky Sistem Tarifor përbën hapin më të madh cilësor për zbatimin e plotë të së drejtës së autorit në Shqipëri. Anulimi i tij do të na kthente në periudhën e errët të mosfunksionimit të së drejtës së autorit në Shqipëri edhe për shumë vite të tjera. Klan TV, Top Channel, Digitalb, Top Albania Radio, Vizion Plus, Tring, RTSH, Abissnet, etj, janë mbledhur të gjithë bashkë, pa dallim, që të vazhdojnë të mos paguajnë ASGJË për të drejtën e autorit të veprave që transmetojnë, ashtu siç kanë vepruar në gjithë këto vite.
Për sa kohë ky proces vazhdon, të gjithë autorët dhe artistët duhet të tregohen të vendosur e të bashkuar për një kauzë të drejtë në mbrojtje të së drejtës së autorit në Shqipëri. Ashtu siç këto media kaq të fuqishme paraqiten të bashkuara për mbrojtjen e interesave të tyre abuzive, ashtu edhe autorët dhe artistët duhet të jenë sa më shumë në numër e të bashkuar për të shprehur qëndrimin e tyre të vendosur në këtë proces.

Për arsyet e mësipërme,
Ju ftojmë të gjithëve të na bashkoheni duke qenë të pranishëm në këtë proces gjyqësor ditën e premte, datë 16 Mars 2018, në ora 10.00, pranë Gjykatës Administrative të Apelit në rrugën e Durrësit (ish-Ministria e Mjedisit), Tiranë.

KËSHILLI DREJTUES I ALBAUTOR