Pak kurajo për gazetarët !

Adri Stefa

Politikani i madh vdes për mikrofonat. Sapo i sheh shkon dhe ngulet përpara tyre dhe fillon të flasë brroçkulla dhe përralla për net të gjata dimri, jashtë pyetjeve që gazetarët i bëjnë.

Kur ndonjë gazetar i kërkon të përgjigjet konkretisht e të mos shpenzojë kohën e tyre dhe të publikut me broçkullat e përhershme, ai i përgjigjet duke e sharë, kërcënuar e intimiduar.

Dhe ndërkohë që gazetari që respekton veten, profesionin dhe misionin e gazetarit objektiv mund të debatojë (ai në kufijtë e etikës, politikani me kërcënime të hapura e arrogancën e pushtetit) gazetarët e tjerë heshtin dhe vazhdojnë të[ mbajnë mikrofonat përpara gojës së tij.

Asnjë gazetar nuk kishte kurajon t’i kthente shpinën politikanit dhe të mos dëgjonin përrallat, shpifjet e kërcënimet e tij, sepse ashtu e ka marrë urdhrin nga pronari, i cili “pushtetin e katërt” nuk e sheh si mision, por si mjet pasurimi e pushteti.

Në Shqipëri edhe pse është akuzuar e kapur në një sërë aferash korruptive e kriminale, politikani i madh ka mbrojtjen e shumicës së medieve, më saktë të pronarëve të tyre dhe disa analistëve që dalin në TV çdo mbrëmje, për të na treguar edhe ata nga ana e tyre përrallat e radhës…

Dhe arsyeja dihet prej të gjithëve e nuk mund të fshihet.

Prej korrupsionit dhe pushtetit të politikanit të madh kanë përfituar, përfitojnë dhe shpresojnë të përfitojnë edhe ata.

Prandaj dhe e mbrojnë me mish e shpirt.

Por ai nuk është i vetëm. Si ai janë shumë politikanë të mëdhenj…

Ndaj shpresoj që SPAK të funksionojë realisht, jo vetëm që të qërrojë njëherë e mirë këta politikanë qelbësira, por edhe që duke dënuar këta politikanë të mëdhenj, mbase u kthen kurajon edhe gazetarëve, në mënyrë që të realizojnë siç duhet misionin e tyre dhe gazetaria të quhet gazetari!