Palmer bën sërish apel: Urgjente nisja e dialogut dhe marrëveshja Kosovë-Serbi

I dërguari posaçëm për Ballkanin Perëndimor, Matthe Palmer, tha se Uashingtoni e konsideron një çështje urgjente vijimin e procesit për një marrëveshje gjithëpërfshirëse.

“Nuk besoj se kemi një afat  se kur duhet të arrihet marrëveshja, por SHBA e konsiderojnë një çështje urgjente. Koha nuk është në anën tonë. Sa më gjatë të presim, aq më e vështirë do të jetë, sfidat do të jenë më të komplikuara” tha Palmer.

Palmer komentoi deklaratat e Albin Kurtit duke thënë se Shtetet e Bashkuara mbështesin prioritetet për luftën kundër korrupsionit dhe forcimin e shtetit, por sipas tij dialogu është i pashmangshëm.

“Kam dëgjuar përparësitë që Z. Kurti vuri në dukje; transparenca, qeverisja e mirë, lufta kundër korrupsionit, rregullimi i situatës në Kosovë. Këto janë përparësitë tona, ne duam që e gjithë kjo të ndodhë në Kosovë. Kosova mund të marrë pjesë në këtë dialog në një mënyrë konstruktive duke u marrë me reformat e brendshme. Unë nuk shoh ndonjë kontradiktë midis këtyre përparësive.” tha ai ndër të tjera.