PD kallëzon sërish për shpifje kryebashkiakun Veliaj

Mësohet se padia e dytë e PD është sërish për deklaratat e Veliajt se Basha ka marrë makinë nga një prej firmave që po kryen punimet në Unazën e re në Astir, deklaratë që sipas PD është shpifje.

“Këto të pavërteta janë bërë me qëllim dëmtimin e reputacionit dhe dëmtimin e imazhit në mënyrë të qëllimshme, duke qenë se Lulzim Basha është Kryetar i PD në opozitë dhe Erion Veliaj, si drejtues i fushatës zgjedhore të PS për qarkun e Tiranës, këto deklarime shpifëse i përdor për të përfituar kredo politike përballë qytetarëve, si për vete dhe për PS”, thuhet në padinë e ngritur për shpifje ndaj Erion Veliajt.

Më herët, pak ditë më parë PD ka depozituar padi për shpifje ndaj kryebashkiakut dhe argumentonte se Veliaj ka bërë 3 akuza konkrete ndaj Bashës, të cilat demokratët i konsiderojnë shpifje dhe përfshijnë akuzat se 1) kryedemokrati është bërë me 4 shtëpi pas tërmetit të 26 nëntorit; 2) se Basha ka përfituar gjatë periudhës së fatkeqësisë së tërmetit dhe 3) se ka ndërtuar pa leje.