Përfundon mbledhja e Komisionit të Rithemelimit në selinë e PD, flet Berisha

Përfundon mbledhja e Komisionit të Rithemelimit në selinë e PD, flet Berisha

Pas zbardhjes së vendimit të Gjykatës ditën e sotme për njohjen e statutit të Partisë Demokratike miratuar në Kuvendin e 11 Dhjetorit, Berisha ka njoftuar mbledhje të Komisionit të Rithemelimit, e cila nisi në orë 13:00.

Mësohet se çështjet që janë diskutuar në këtë mbledhje kanë të bëjnë më deklaratën e ambasadores Yuri Kim një ditë më parë e cila njohu Enkelejd Alibeajn si ushtrues të detyrës së kryetarit dhe drejtuesit të Grupit Parlamentar të PD.

Situata aktuale të PD dhe mundësinë e bashkimit të saj. Pritet gjithashtu diskutime lidhur me mbledhjen e Grupit Parlamentar. Një tjetër çështje për t’u diskutuar lidhet me riorganizimin e partisë në bazë, me zgjedhjen e kryetarëve të degëve që pritet të mbahet më 20 Prill.

Sakaq një tjetër pikë  është ajo për çështjet që lidhen me organizmin e Kuvendit Kombëtar të PD, që pritet të mbahet më datë 30 Prill, ku do të lindin institucionet dhe forumet e reja të PD.

Nga ana tjetër Enkelejd Alibeaj ka kërkuar që të ndalet ajo që është duke u përgatitur nga Komisioni i Rithemelimit, pikërisht Kuvendin Kombëtar, por Berisha i ka kujtuar vendimin e Gjykatës, duke thënë se kjo është një nga arsyet për të treguar se ky grup është ai që është në krye të Partisë.

Mësohet se në këtë mbledhje marrin pjesë anëtarët e Grupit të Rithemelimit dhe ish-funksionarë apo ish-deputetë të PD, ndërsa në fund të mbledhjes pritet që Sali Berisha të mbajë një deklaratë për mediat.

Vendimi i zbardhur sot, dhënë nga gjyqtari Agron Zhukri më 25 mars, njohu si legjitim Kuvendin e 11 dhjetorit, të thirrur nga ish-kryeministri Sali Berisha, duke i hapur kështu rrugë zyrtarisht Komisionit të Rithemelimit.