Përplasjet te Kuvendi, 5 protestues arrestohen nga policia

Të paktën pesë protestues janë shoqëruar nga policia gjatë tubimit të zhvilluar përpara ambienteve të Kuvendit, pasi kanë depërtuar brenda perimetrit të sigurisë të vendosur nga autoritetet.

Mes personave të shoqëruar ndodhet edhe aktivisti Gent Progni. Ndërhyrja e forcave të rendit erdhi menjëherë pasi protestuesit u futën në zonën e kufizuar, duke detyruar policinë t’i largojë nga hapësira e mbrojtur.

Sipas të dhënave paraprake, hyrja në perimetrin e sigurisë është bërë përmes zonës së pedonales, ku qarkullimi drejt lokaleve dhe bareve nuk ishte i bllokuar, çka ka krijuar mundësi për depërtimin e protestuesve.

Ndërkohë, situata në terren mbetet nën kontrollin e forcave të policisë, të cilat vijojnë të mbajnë të përforcuara masat e sigurisë përreth godinës së Parlamentit.